DILI, STLTIMORLESTE.com – Eskola Sekundáriu Jeral (ESJ) 10 Dezembru Komoro sei menus profesores, tanba nee husu Ministeriu Edukasaun (ME) atu apoiu profesores ba materia 4 mak hanesan materia português, inglês, sosiolijia no materia eksata 1.
Kestaun nee hatoo husi Diretor Eskola Sekundariu Jeral 10 Dezembru Komoro, Manuel Verdial ba jornalista STL, Kuarta (13/08/2025).
Nia dehan, iha nee maizumenus sei presiza tan professores nain 4 ba materia 4 nian.
“Kona-ba profesores hanorin, kuaze ita tetu ba mai ona. Ita analiza ona karga orariu liga ba kreditur nian, nee katak total oras ba materia ida nee hira, ita koloka ema tuir ida nee. Neebe ita mais ou menus profesores nain 4 mak ita sei presiza tan ba materia português, inglês, sosiolijia no materia eksata 1. Durante nee profesores ba materia 4 nee seidauk iha,” nia afirma.
Manuel dehan, maske durante nee profesores sira hanorin hela materia haat nee ba estudantes sira, maibe eskola mak bele jere, atu nunee bele asegura estudantes no labele abandona estudantes sira iha prosesu aprendizajen. Karga orariu nee taka ba mai, atu nunee labele abandona estudantes iha sala, tanba ida nee laos sai razaun hodi abandona estudantes.
Nia hatutan, profesores neebe koloka iha eskola refere hamutuk 69, estudantes 1,685 no sala aprendizajen hamutuk 32.
(jac)
