DILI, STLTIMORLESTE.com – Ministru Justisa (MJ), Sergio Hornai hatete, importante duni atu estabelese Sentru Juvenil, tanba sira halao ona akordu ho Ministeriu Solidariedade Sosial no Inkluzaun (MSSI).
“Sentru Juvenil ita halo hela koordenasaun ho akordu entre ministerial ida neebe ita halo daudaun ho Ministeriu Solidariedade Sosial,” dehan MJ, Sergio ba jornalista sira iha nia servisu fatin, Kaikoli, Dili, Kuarta (13/08/2025).
Nia hatutan, objetivu prinsipal mak buka oinsa ita bele halo servisu hamutuk ho MSSI atu estabelese sentru juvenil ida, tantu saude, atu halo reabilitasaun ida diak ba ita nia oan sira. Iha ekipa tekniku balu halao hela servisu, iha kestaun balu tekniku sira halao hela servisu.
Iha fatin ketak, Jurista Sergio Dias Quintas dehan, importante estabelese sentru Juvenil. “Hau hanoin Sentru Juvenil nee importante tebes para Governu bele estabelese Sentru Juvenil, ida nee Governu nia planu neebe diak, tanba ita hatene katak iha kodigu penal labarik sira neebe mak idade 16 mai kraik nee imputalidade por razaun de idade, entaun sira labele hetan responsabilidade kriminal,” dehan Jurista Sergio.
Nia hatutan, banhira lei defini katak, sira laiha responsabilidade kriminal, entaun sira labele kastigu hamutuk ho ema idade neebe boot. Ho ida nee Governu tenke kria kondisaun ida ou sentru ida para sulan sira iha neeba.
(ter)
