TURISKAI, STLTIMORLESTE.com – Selebra aniversariu FALINTIL ba dala 50, Prezidente Republika (PR), Jose Ramos Horta ho Komandante FALINTIL – Forsa Defeza Timor Leste (F-FDTL), Falur Rate Laek inklui ekipa nomos Jeneral Reformado Lere Anan Timur vizita fatin ikus Saudozu Nikolao Lobato iha Binani Turiskai, neebe lokaliza iha Suku Mindelo, Postu Adminisrativu Turiskai, Munisipiu Manufahi.
Iha biban nee Prezidente Republika Jose Ramos Horta ba jornaslista sira iha Binani, Sabadu nee (16/08/2025) hatete, nia vizita nee hanesan vizita respeitu omenajen ba Nikolao Lobato hodi haree mos ho matan fatin nee, nunee bele halo buat ruma rai neebe nia monu ultima bala iis kotu fatin nee, hodi sai rai ida sagradu.
Iha diskursu Prezidente hatete, tanba saida mak vizita fatin istoriku nee, tanba iha fulan ruma liu ba kleur ona prezidente sempre hanoin atu vizita Saudozu Nikolao Lobato nia fatin ikus, inklui mos Saudozu sira neebe mate iha fatin refere.
“Hau koalia ho hau nia staf balun hau deside tinan ida nee ba duni, maibe iha momentu nee hau hanoin hau mai mesak ho Jose Lobato, nee deit buat ida informal, ema nain rua nain tolu depois mak bele hanoin halo serimonia, hau husu ba Jeneral Lere nuudar hau nia asesor senior hanoin nee ho F-FDTL halo kontaktu ho instituisaun ida depois buat nee sai boot los. Hau koalia ho Maun Xanana nia kontente ho idea, maibe nia hatete nia hakarak haree halo eventu ida formal solene maibe iha loron neebe Nikolao Lobato mate iha dia 31 Dezembru, hau hatete ba maun boot 31 Dezembru bele udan boot maibe nia hatete la buat ida, agora fila koalia tok ho Jeneral sira, ho familia, ita halo duni ka lae 31 Dezembru nee ita boot sira mak haree pratiladidade tanba halo serimonia boot ema rihun ba rihun,” dehan PR Horta.
Nia hatete, nee nia ideia maibe depois mak governu no familia sei deside bele halo ka lae?. Maibe Prezidente iha ona hanoin atu halo jardin Nikolao Lobato iha Binani.
Prezidente Republika hatete, loke Jardin Nikolao Lobato nee sei la limite se deit bele mai hodi halo peregrinasaun iha fatin nee, tuir ema nia fiar no kultura, tanba saudozu Nikolao Lobato ema ida neebe fiar nain sempre reza sempre kaer biblia iha nia liman.
“Nee duni hau fiar fatin ida nee mos sai fatin espiritual, Jardin Nikolao Lobato no sira seluk neebe mate iha fatin nee omenajen mos ba sira hamutuk ho Nikolao Lobato,” katak Horta.
Xefe Estadu hatete, memoria naran Nikolao Lobato ema labele haluha no povu labele haluha naran ida tama iha istoria.
Iha sorin seluk Jose Lobato, oan husi Saudozu Nikolao Lobato hatete, Prezidente iha hanoin atu halo jardin iha Binani, no iha 2015 tinan 10 liu ba nia iha fatin nee ho jornada funsaun publika nia dalan nee izoladu tebes dalan so fatin lao ain deit, maibe husi neeba mak komesa loke dalan.
“Se Prezidente Republika iha hanoin halo Jardin Nikolao Lobato nee signifika mos husi estadu tenke tau fasilidade iha nee, entaun hau hanoin bele ajuda hasai area Binani suku Mindelo husi izolasaun,” katak Jose.
Nia hatete, rai Mindelo nee tinan 10 liu ba haree bokur, bainhira lao husi Suku Mindelo too Binani kafee laku barak iha dalan signifika rai nee iha potensia, tanba nee nia apoiu idea Prezidente Republika hodi halo jardin Nikolao Lobato.
(eme)
