TURISKAI, STLTIMORLESTE.com – Jeneral Reformadu Lere Anan Timur hamutuk ho povu Turiskai selebra misa agradesimentu selebrasaun aniversariu FALINTIL ba dala 50 iha Suku Mindelo, Postu Administrativu Turiskai, Munisipiu Manufahi.
Liu husi omilia Padre Selebrante Pe. Jose dos Santos da Silva hatete, halibur hamutuk iha fatin nee hodi selebra misa komemorasaun aniversariu FALINTIL ba dala 50, iha loron importante nee hanoin luta nain sira liu-liu Saudozu Nikolao Lobato no eroi seluk hamutuk ho luta nain sira neebe mak sei moris ba sira nia didikasaun tomak, hodi fo aan hodi lori rai nee ba hetan ukun rasik aan.
“Ohin selebra misa ba komemorasaun loron FALINTIL ba dala 50, iha loron importante ohin igreza mos selebra loron Nossa Senhora nia loron. Oras nee mos la planu, maibe misa los iha tuku 7:30 kalan no seminarista sira babain oras hanesan nee mos reza tersu, no oras nee daudaun ita nia Saudozu Nikolao Lobato reza tersu hela hamutuk ho ita iha fatin nee hamutuk ho Nossa Senhora,” dehan Padre Selebrante liu husi nia omilia Sesta kalan (15/08/2025).
Padre dehan, Saudozu Nikolao Lobato mos hanesan seminarista ida, no ema ida neebe mak kaer tersu. Komisaun nia planu karik mak misa monu los loron Nossa Senhora nia loron.
Padre husi oomilia hatete, Maromak foti ema riku sira nia fatin hodi fo fali ema kiik sira, nia rai buat diak hotu ba ema mukit sira hodi haruka ema riku sira fila fali ho liman mamuk.
“Nain hamutuk ukun nain sira nia tuur fatin foti fali ema kiik sira, nia haraik buat diak ba ema mukit sira hodi haruka ema riku sira fila fali ho liman mamuk. Se ita sira lembra Timor nee kiik iha mundu, no ita nia nain ulun sira ohin loron mos sei kiik liu, ita kompara ita nia okupador Indonezia, Portugal kompara ho ita Timor kiik iha mundu nia matan no iha inimigu nia matan, maibe tanba saida mak ohin loron ita mai hamutuk iha nee selebra ita nia vitoria. Ita konsege duni ho ita nia aman luta nain sira nia esforsu hamutuk ho ita nia aman sira balun ohin loron tuur iha nee,” katak Padre.
Padre dehan, maske Timor kiik iha mundu nia matan maibe ho estratejia luta nain sira nia, hodi lori rai nee hamriik nuudar rai ida neebe demokratiku no independensia.
(eme)
