DILI, STLTIMORLESTE.com – Relasiona loron FALINTIL neebe monu iha loron 20 Agostu 2025, tanba nee Komando FALINTIL – Forsa Defeza Timor Leste (F-FDTL) realiza atividade iha munisípiu hotu-hotu inklui Munisípiu Ermera, membru F-FDTL sira halao marsa husi Munisipiu Bobonaro too iha Munisípiu Ermera.
“Bazeia ba orden Komando ami marsa FALINTIL komesa iha dia 10 Agostu husi Munisipiu Bobonaro foin too iha Munisípiu Ermera,” hatete Kapitaun Germano Nesta husi Komponente Forsa Terestre ba jornalista sira iha Ermera Villa, Sabadu lokraik (16/08/2025).
Nia dehan, marsa ida nee objetivu ba komemorasaun loron FALINTIL ba dala 50, no durante marsa nee hamutuk ho estudante sira husi UNTL neebe hadomi natureza, sira mos lao hamutuk ho membru F-FDTL sira lao husi Bobonaro too mai Ermera, sira nia fiziku no moral forsa nafatin.
“Normalmente dezafiu nee sempre iha, maibe ami sempre hasoru no buat hotu lao diak, ita sempre hasoru loron manas, anin, malirin, maibe buat hotu ita hasoru no lao diak too mai agora,” nia deklara.
Nia informa, membru F-FDTL too iha Ermera depois hetan konvite husu Cup Ristu Rey Ermera atu halao Desportivos Jogu Amizade hodi bele selebra loron FALINTIL nian neebe sei monu iha Loron 20 fulan Agostu tinan ida nee.
“Ami halo jogu amizade entre juventude husi Ermera Lama ho membru F-FDTL neebe joga ohin ita asiste,” nia deklara.
Iha fatin hanesan Jogador Justo Dias informa, joven Ermera kontente tebes-tebes ho Komando F-FDTL mai halao sira nia atividade marsa husi Bobonaro too Ermera no halao desportivu jogu iha Munisípiu Ermera.
“Ami juventude halo jogu amizade ho ita nia membru F-FDTL sira, ami kontente tebes ho atividade jogu ida nee, no ita mos sente katak loron FALINTIL neebe sei selebra iha 20 Agostu, ita fo mos parabens ba aman veteranu sira no inan sira neebe uluk luta ba independensia, ohin loron ita juventude sira simu gratuita ukun rasik aan ida nee,” nia afirma.
(jen)
