DILI, STLTIMORLESTE.com – Bankada 2 husi Partidu FRETILIN no PLP kontinua ba iha Tribunal Rekursu (TR), hodi konfirma kona-ba dokumentus neebe antes nee sira hatama ona, husu TR atu halo justifikasaun kona-ba akordaun neebe fo sai kona-ba inkonstitusionalidade ba nomeasaun Prezidente Tribunal Rekursu.
Liafuan nee haktuir husi Deputadu Bankada FRETILIN, David Dias Ximenes ba jornalista sira iha Kaikoli, Segunda (18/08/2025).
Nia dehan, sira mai husu tuir dokumentus neebe lori mai iha loron 11 de Agostu nee, atu husu tuir dokumentus nee nia prosesu lao oinsa.
“Ohin sira esplika mai ami dokumentus nee sei ba iha Juiz turnu depois maka sei tama iha Juiz titular prosesu nee nian, depois sei ba fali iha prosesu sentral depois maka sei halo fali notifikasaun mai ita,” dehan Deputadu nee.
Nia hatutan, sira dehan hein deit no neneik sei notifika sira, no sira mos konfirma konaba iha prazu ka lae, maibe iha esplikasaun husi parte Tribunal Rekursu nian katak, prosesu sira hanesan nee la iha prazu, tanba nee husu atu sira hein deit depois Juiz titular deside ona sei notifika ba sira nia parte.
Nia afirma, razaun sira hatama dokumentus nee, husu atu halo justifikasaun konaba desizaun neebe Tribunal Rekursu deside ona konaba inkonstituisionalidade ba alterasaun Lei organizasaun judisiariu, tanba mosu polemika iha sosiedade ho ida nee maka sira hatama dokumentus ida atu husu Juiz sira bele fo esplikasaun klaru konaba desizaun nee.
(ter)
