DILI, STLTIMORLESTE.com – Timor Leste (TL) ho Estadu Unidus Amerika (EUA) sei hametin kooperasaun iha area maritima no seluk tan.
Kestaun nee hatoo husi Enkaregadu Negosiu Estranjeiru EUA Mai Timor Leste, Bruce Begnell ba jornalista sira, bainhira remata halo enkontru ho Prezidente Republika, Jose Ramos Horta iha palasiu Prezidensial Nicolau Lobato, Bairo Pite, Dili, Tersa (19/08/2028).
Enkaregadu Negosiu Estranjeiru EUA nee hatete, enkontru ho Prezidente Republika nee diak tebes, no iha hasoru malu nee diskuti kona ba kooperasaun iha area seguransa nomos kooperasaun Bilateral.
“Obrigadu ohin hau halo enkontru neebe diak tebes ho Prezidente ami koalia kona ba kooperasaun seguransa, nomos assuntu seluk diskusaun lao diak tebes, no Prezidente mos ema ida neebe omilde tebes no enkontru nee lao diak ba oin hakarak reforsa liu tan ita nia kooperasaun bilateral neebe iha,” dehan nia.
Estadu Unidos Amerika ba oin hakarak hametin diak liu tan kooperasaun entre rai rua iha futuru, liu liu area seguransa Maritima.
“Ba oin ami hakarak ita serbisu hamutuk mos ho nasaun parseru sira iha rejiaun nee iha area koperasaun seguransa Maritima nia,” katak nia.
Nia hatutan, kooperasaun Maritima nee laos ezercicio konjuntu entre Estadus Unidus Amerika ho Timor Leste deit, maibe ezersísiu konjuntu ho nasaun rejiaun sira seluk hanesan Australia iha ambitu kooperasaun defeza.
(eme)
