DILI, STLTIMORLESTE.com – Prezidente Republika (PR), José simu karta Kredensial husi Embaixador foun Brazil mai Timor Leste (TL), iha biban nee Prezidente Republika hatete, TL halo amizade ho Brazil dura ona.
Prezidente Republika Jose Ramos Horta formalmente simu Karta Kredensial husi Ricardo Lustosa Leal, Embaixador Estraordinariu no Plenipotensiariu foun husi Republika Federativa Brazil mai Timor Leste.
Serimonia nee halao iha Palasiu Prezidensial Nicolau Lobato, Tersa nee (19/08/2025) hodi reafirma lasu diplomatiku neebe metin entre nasaun rua nee.
Embaixador Ricardo Lustosa Leal maka diplomata kareira distintu ida ho esperiensia barak iha servisu estranjeiru Brazil nian. Durante nia mandatu, nia serbi iha misaun diplomatika xave sira, inklui Ramallah, Vatikanu, Cabo Verde, no Londres.
Nia kontribui ona ba publikasaun akademiku sira, no hetan ona promosaun dala barak iha korpu diplomatiku nia laran tanba nia servisu meritoriu, sublina ninia dedikasaun hodi avansu parseria global sira Brazil nian.
Dezde estabelese relasaun diplomatika iha 20 Maiu 2002, Timor-Leste no Brazíl aprofunda ona kolaborasaun iha area edukasaun, defeza, administrasaun publika, saude, no agrikultura. Brazíl halao ona knaar sentral hodi fo apoiu ba Timor Leste nia setor justisa, formasaun profisional, no ensinu superior, inklui estabelesimentu programa Mestradu iha Universidade Nasional Timor-Leste (UNTL). Estudante timoroan liu 130 no bolseiru relijiozu mos hetan benefísiu husi interkambiu akademiku iha Brazil, neebe refleta kompromisu ba kooperasaun Sul-Sul no dezenvolvimentu mutua.
Prezidente Ramos Horta afirma, “Timor Leste valoriza nia amizade ho Brazil neebe dura ona ba tempu naruk, parseria ida neebe bazeia iha solidariedade no aspirasaun komun. Ita hein atu hametin liutan ita nia kooperasaun iha area sira interese komun nian, hodi promove dezenvolvimentu sustentavel no ligasaun entre povu ho povu.” katak PR Horta.
Prezidente hatudu ninia konfiansa katak ho lideransa Embaixador Leal nian, relasaun bilateral sira sei kontinua sai buras, hodi kontribui ba pas no prosperidade iha nasaun rua nee.
(eme)
