BAUKAU, STLTIMORLESTE.com – Projetu reabilita estrada diresaun husi area Kairavela ba too Aeroportu Lanud Baukau, sei fui alkatraun iha fulan Outubru tinan nee.
Xefe Suku Tirilolo, Elvino Freitas Belo hatete, projetu reabilitasaun estrada diresaun Kairavela too Aeroportu Lanud Baukau hatudu progresu diak no konsidera kompanhia refere implementa projetu ho lais neebe tarjetu sei finaliza iha tempu besik.
“Durante servisu ami lider komunitariu nia haree tembok penan konklui ona, fulan rua tan hanesan nee sira bele tau ona beskos no aspal bee ona,” hateten Elvino ba STL, iha knaar fatin, Tirilolo, Baukau, Tersa (19/08/2025).
Tuir lider komunitariu nee katak, projetu reabilita estrada husi Kairavela too Aeroportu Lanud Baukau ho tempu servisu tuir kontratu tinan ida, maibe inisiu servisu too ohin loron parte kompanhia konklui servisu inisiu husi inisiu hanesan ateru rai mutin, rai henek no seluk tan.
Tanba servisu neebe dadaun kompanhia kontinua halo iha terenu mak hanesan, beskos no fui alkatraun been, maibe hirak nee kuandu finaliza hotu bele fasilitas ona komunidade sira hodi lori sai produtu lokal asesu merkadu.
“Tuir ita hotu nia haree projetu neeba nee fo benefisiu ba ita nia komunidade sira, tanba durante nee ita nia komunidade sira iha neeba susar lori produtu mai merkadu, maibe agora dadaun ita haree sira lori ona produtu mai vila, tanba estrada diak ona,” Elvino argumentu.
Nia konta, tinan liu ba kondisaun estrada husi area lanud ba Kaisidu too iha area Uaiono-Uaisae difikulta tebes movimentu transporte publiku no privadu, tanba kondisaun aat tebes, maibe hafoin Governu kontaktu Kompanhia halo reabilitasaun dadaun hahu ona fasilita movimentu transporte.
Iha sorin seluk, Diretor kompanhia DVP Costruction neebe responsabiliza projetu refere, João da Silva esplika, projetu reabilitasaun ligasaun estrada diresaun husi Kairavela too Aeroportu Lanud Baukau hamutuk kilometru 8 resin neebe Governu liu husi Ministeriu Planeamentu no Investimentu Estratejiku (MPIE) lansa fatuk dahuluk iha loron 11 Janeiru tinan nee ba durasaun servisu fulan 12, neebe tuir planu remata iha fulan Janeiru tinan 2026 no tuir planu tempu besik sei fui alkatraun.
“Ami nia item servisu neebe agora dadauk ami halo mak sabies tempu besik sei remata ami sei koordena ho projetu nia nain ba servisu tuir mai biskos ita bele nahe aspal ona tuir planu iha fulan Setembru ou Outumbru,” katak João.
Nia sublina, hafoin Governu lansa fatuk dahuluk ba projetu refere parte kompanhia hahu implementa servisu too ohin loron atinji progresu diak, tanba parte kompanhia implementa servisu sira neebe rematw ona mak hanesan konstrui mini ponte, ateru rai mutin no seluk tan hanesan ateru estrada ho rai henek (Sabies) kuaze remata ona.
Entretantu projetu reabilitasaun estrada diresaun Kairavela too Aeroporto Lanud Baukau hamutuk km 8 resin, neebe responsabiliza husi kompanhia lokal 2 mak hanesan Kompanhia DVP Construsaun Unipesoal Lda MPIE kontratu ho valor orsamentu US$ 4,386,542.91 no kompanhia Central Hill Unipesoal, Lda ho valor orsamentu US$ 2,537,086.
(tom)
