BAUKAU, STLTIMORLESTE.com – Eskola Tekniku Vokasional Publiku (ETVP) iha Vila Nova, Baukau, durante nee laiha sala laboratoriu ba estudante sira, husi Departementu Eletrisidade utiliza hodi halao pratika.
“Hau nuudar estudante sente triste, tanba ami departementu eletrisidade seidauk iha sala hodi utiliza halao pratika,” espresa estudante Cristiano Gama da Costa ba jornalista sira iha Vila Nova, Baukau, Kinta (21/08/2025).
Estudante terseiru anu husi departementu eletrisidade nee katak, durante nee Eskola Tekniku Vokasional Publiku (ETVP) Vila Nova laiha sala laboratoriu ba estudante sira, husi departamentu eletrisidade obrigadu tenke utiliza deit cobe house neebe estabele iha tinan hirak liu ba, maibe daudaun kondisaun aat no la seguru.
Aleinde sala laboratoriu permanente ba estudante husi departamentu eletrisidade, ekipamentu pratika nian hanesan safenda no ekipamentu seluk tan neebe relevante ba pratika eletrisidade nian.
“Hau nia rekomendasaun ba Governu liu husi Ministeriu Edukasaun, atu harii ami nia sala no apoiu ekipamentus pratika nian hodi ami bele uza ho diak,” estudante nee rekomenda,
Iha fatin hanesan Diretor ETVP Vila Nova Baukau, Elisiario Deonisio dos Santos rekonhese, durante nee eskola laiha sala laboratorium propriu ba estudante atu halo pratika, tanba nee no provizoria utiliza cobe house, maibe kondisaun hahu aat no laiha espasu atu estudante sira atu pratika.
Entretantu Diretor Servisu Munisipal Edukasaun Baukau, Afonso dos Santos da Costa hateten, kestuan refere parte Servisu Edukasaun Baukau seidauk simu informasaun husi eskola, maibe sei oriente ekipa tun ba terenu hodi halo levantamentu dadus no enkamina ba Ministeriu hodi solusiona.
(tom)
