DILI, STLTIMORLESTE.com – Servisu Edukasaun Munisipiu (SEM) Likisa no Manatuto too agora seidauk simu pedidu husi eskola, liga ba eskola neebe estragus husi anin boot neebe akontese durante nee.
Diretor Servisu Edukasaun Munisipiu Manatuto, Patricio da Cruz Quintao dehan, liga ba anin boot durante nee, husi eskola seidauk fo informasaun kona-ba eskola neebe hetan estragus husi anin boot, tanba nee ate ohin loron seidauk simu informasaun.
“Kona-ba asuntu ida nee, hau nuudar Diretor SEM, hau sei husu lai, tanba husi eskola seidauk fo informasaun mai ami, nee duni ami sei konfirma ho eskola,” esplika nia ba STL liu husi telefone, Kinta, (21/08/2025).
Nia dehan, los duni katak, durante nee anin boot tebes, maibe eskola sira seidauk estragus husi anin boot, tanba kuandu akontese eskola hetan estragus, nee sira sempre fo informasaun ba parte SEM para hatene.
Nunee mos Diretor Servisu Edukasaun Munisipiu Likisa, Julio da Silva dehan, kona-ba anin boot durante nee eskola sira iha Munisipiu Likisa la hetan estragus husi anin, tanba husi eskola seidauk hatoo informasaun nee mai iha Servisu Edukasaun Munisipal.
(jac)
