BAUKAU, STLTIMORLESTE.com – Iha loron 24 Agostu, iha loraik nee mosu engarrafamentu iha ponte diresaun Baukau-Lautem, iha Postu Administrativu Laga difikulta movimentu emerjensia.
“Foin engarrafamentu iha ponte laga nee, tanba ponte ida iha fali ponte ida nia leten entaun karreta boot husi Norinco Internasional nian nee mak besik tiha, tanba nia roda nee mak halai ses tiha tama ba kuak laran tabele tiha entaun karreta husi Baukau Lospalos liu la diak,” hatete Xefe Suku Soba Laga, Francisca Monica de Fatima Correia ba STL liu husi telefone, Domingu (24/08/2025).
Xefe Suku nee esplika, kondisaun ponte Laga iha tinan hirak liu ba aat, tanba nakfera nunee kompanhia internasional Simona neebe responsabiliza reabilita estrada Diresaun Baukau-Lautem foti inisiativa tau besi iha ponte refere hodi fasilita movimentu transporte, maibe besi neebe kompanhia tau laos taka tomak, tanba fo deit espasu ba roda karreta nian, maibe iha klaran no ninin fo ameasa, tanba bainhira kondutor foti sala roda karreta bele tama ba kuak laran.
Nunee iha loron 24 Agostu, iha loraik, karreta fuzu husi kompahia Norinco neebe responsabiliza ba projetu reabilitasaun estrada diresaun Laga-Baguia diresaun husi Laga Vila ba Baukau, maibe kondutor foti sala diresaun roda karreta tun ba kuak laran hodi karreta refere metin iha fatin hodi hamosu engarrafamentu durante besik oras 1 resin iha ponte refere.
“Engarrafamentu nee besik oras ida hanesan nee, tanba karreta halai ses belit metin la rezulta ema kanek maibe engarrafamentu mak makaas liu, nee mak derepente ema moras emerjensia ita rujuk ba Baukau mos nee bele mate, ohin nee laiha maibe ita hanesan antisipa deit,” katak Franscisca.
Lideransa Komunitariu nee sublina, durante engarrafamentu iha Ponte Laga la rezulta ema ruma kanek, maibe implika ba movimentu transporte publiku no privadu, tanba laiha dalan alternativu atu transporte sira liu.
Maibe durante engarrafamentu iha ponte Laga tuir videografer neebe publika husi sidadaun sira iha media sosial neebe STL nota, karreta multi funsaun ida husi Ministeriu Saude diresaun husi Laga Vila ba Baukau Vila foti risku liu husi roda parte karuk liu husi besi neebe estabele no roda parte loos liu husi ponte orijen hafoin liu hodi kontinua viajen.
(tom)
