AMBENO, STLTIMORLESTE.com – Jogu futebol final Juvenil Copa 2025 husi ekipa mane, FC Kalma Padiae Sentral VS FC Sporting Oetulu ho skor 2-1, nunee FC Kalma sai vensedor primeiru Lugar, FC Sporting Oetulu Segundu Lugar no FC Suni Ufe sai terseiru lugar, nunee husi jogu ekipa feto, Primeiru Lugar husi FC Sao Joao Baptista, Segundu Lugar husi FC Sao Miguel Arcanjo Oebaha, Terseiru lugar husi FC Fini, husi FC Sporting Nunbei sai IV lugar.
Jovenil Copa 2025 neebe dadaun realiza iha Rejiaun Administrativa Espesial Oekusi-Ambeno (RAEOA), hetan apoiu husi Federasaun Futebol Timor Leste (FFTL), halao ba kada assosiasaun iha RAEOA.
“Jogu Juvenil Copa 2025, U-17, ita halo selesaun ba clubu sira neebe ejiste iha Oekusi, iha Clubu 16 ba jogu futebol Mane, no jogu juvenile feto nian, hamutuk Clubu 4, ida nee ba labarik sira neebe moris iha tinan 2008 too 2009. Hafoin jogu ida nee remata, ami halo selesaun ba jogador hamutuk 18 atu compete fali iha nivel Rejional, tanba nee Oekusi tama iha Rejional Ermera nian. Depois jogu rejional hotu, kuandu ita manan, sei kontinua jogu iha nivel nasional iha jogu juvenile Copa 2025,” dehan Sekretariu Jeral Assosiasaun Futebol Oekusi (AFO), Julio Coel ba STL iha Futebol Oebau, Suku Costa, Postu Administrativu Pantemakassar, RAEOA, Sabadu (23/08/2025).
Nia dehan Selesaun jogu ida nee ba jogador U-17, AFO nia esperansa katak, ho jogu selesaun nee, bele prepara fini diak ba talentu jogadores husi Oecusse neebe maka sei kompete iha jogu Nasional no Internasional.
“Jogu nee ita hetan apoiu husi FFTL ba jogador mane ho total orsamentu hamutuk US$ 2.500 nunee mos ba jogador Feto mos ho montante hanesan US$ 2.500. hau hanesan Sekretariu Jeral AFO, husu ba oan sira U-17 neebe maka iha talentu ba moedalidade Futebol, tantu feto ho mane, prepara ita boot sira nia aan atu treinu, atu bele jogu iha selesaun Juvenil Copa tinan 2025.
Iha oportunidade nee, Prezidente AFO, Arnaldo Suni liu husi ninia deskursu hatoo agradesimentu wain ba Governu Autoridade RAEOA ho estrutura tomak, Prezidente FFTL, Nilton Gusmao ho nia Sekretariu Jeral ho estrutura, Autoridade Postu Administrativu Nitibe, Pasabe, Oesilo no Pantemakassar, Lider komunitariu sira hotu, Autoridade PNTL ho F-FDTL nia apoiu durante nee ba selesaun jogu juvenil Copa tinan 2025 neebe lao durante semana rua ho balun nia laran neebe realiza iha Oekusi.
“Ita agradese ba Prezidente FFTL, Nilton Gusmao ho nia Sekretariu Jeral hola parte iha jogu final Juvenil Copa tinan 2025, ita orgulhu tanba bola sai hanesan orgulhu nasional, agradese ba parte Saude, Ambulancia, Cruz Vermelha Timor Leste (CVTL) no komisaun organizadora neebe lakole hodi halo selesaun ba jogu futebol Juvenil U-17 tinan 2025 no AFO husu deskulpa ba buat balun neebe AFO halo la kona ita boot sira nia laran,” dehan Prezidente AFO.
Nia dehan, antes joga prepara sepatu, meas hodi kontinua jogu iha nivel nasional, parabens ba vensedor primeiru lugar tubebol Feto no Mane neebe sei lori Oekusi, hodi kontinua tuir selesaun rejional nian hasoru Ermera, Liquica no Bobonaro, tanba nee hahu ohin ba oin, ba jogador sira, para ho fuma, para ho hemu tua no para ho ba festa, nunee prepara aan sai husi Oekusi ho Berlin Ramelau ba Ermera hodi kontinua jogu iha jogu Juvenil Copa Rejional nian neebe sei realiza iha Munisipiu Ermera.
Nilton: Jogadores Oecusse Inspira Dezenvolve FFTL ba oin
Prezidente Federasaun Futebol Timor Leste (FFTL), Nilton Gusmao dehan, bain hira mai partisipa iha jogu ikus selesaun jogadores Juvenil Copa tinan 2025, Inspira nia atu kontinua dezenvolve FFTL ba oin sai diak liu tan.
“Bain hira mai partisipa iha selesaun jogadores Juvenil copa 2025, haree ema barak, inspira hau atu konmtinua dezenvolve FFTL ba oin sai diak liu tan. Iha jogu U-17 iha Oecusse, hatudu mai ita Timor oan hotu, katak ita hahu organiza ona, ita hakarak haree futebol diak liu iha futuru. Ohin ita iha misaun boot ida, ita atu transforma futebol nuudar orgulhu nasional, tanba nee atividades futebol labele halo deit iha Dili laran, maibe tenke halo iha TL laran tomak,” dehan nia.
Ohin asiste jogu final juvenile Copa iha Oekusi, hatudu mai ema hotu katak iha inspirasaun foun ba futebol Oekusi nian.
“Hau lori selesaun Nasional ho Sekretariu Jeral FFTL nia naran neebe ohin Kantaru loos ho jogador manan nain Mane ho numeru Kamizola 11, tanba nee husu ba alin jogador nee atu prepara o nia aan didiak, labele mete ho segaru, hemu tua, tanba iha futuru iha mundu joga bola, tanba nee ami konta ho ita boot atu tama iha jogu nasional U-17 atu hamorin ita nia rain TL iha mundu Futebol. Ba alin feto sira, hau orgulhu tebes, tanba ita hahu ona ho futebol ba ita nia alin feto sira, tanba futebol feto iha mundu, nudar atividade ida neebe ema atensaun boot tebes, tanba nee, ita neneik maibe ita tenke hahu no iha selesaun Jovenil Copa 2025, imi hatudu ona, tanba nee maka ita iha Primeiru Lugar, Segundu lugar no Terseiru lugar,” dehan nia.
Nia dehan, TL iha selesaun nasional ba joga feto iha rai liur, ladun hatudu rezultadu ida neebe maka diak, maibe ho atividades Juvenil Copa 2025 neebe halao iha Munisipiu tomak, espera sei reforsa selesaun ba jogador feto iha futuru mai, tanba nee fo parabens no dezesa jogador sira neebe hatudu ona rezultadu jogu diak.
Nunee mos Orlando Colo reprezenta Prezidente Autoridade Rejiaun Administrativa Espesial Oekusi-Ambeno neebe delega hodi ensera jogu juvenile Copa 2025 neebe maka tinan nee realiza iha Oecusse.
“Hau Reprezenta Prezidente Autoridade RAEOA, agradese ba ita boot sira nia esforsu tomak no ba sira neebe konsege tuir kompetisaun ida nee maske la tama iha final jogu Juvenil Copa tinan 2025 iha Oekusi maibe sei iha oportunidade seluk atu sira kompete no sai vensedor, tanba nee apresia no agradese ba apoiu tomak husi prezidente FFTL neebe serbisu hamutuk ho AFO, hatoo parabens no hau lori PA-RAEOA, Rogerio Tiago de Fatima Lobato nia naran, ofisialmente taka Jogu Juvenil Copa 2025 ho baku mic dala tolu,” hatoo parabens.
Jogador feto, Primeiru Lugar husi FC Sao Joao Baptista Segundu Lugar husi FC Sao Miguel Arcanjo Oebaha, Terseiru lugar husi FC Fini, husi FC Sporting Nunbei sai IV lugar.
(jos)
