BAUKAU, STLTIMORLESTE.com – Ministeriu Juventude Arte no Kultura (MJDAK) apoiu fundu rihun US$ 1 resin ba Autoridade Postu Administrativu Matebian, Munisipiu Baukau, hodi realiza jogu komunitariu.
Prezidente Komisaun Organizadora ba Jogu Komunitariu, Nuno Florindo hateten, jogu komunitariu refere realiza, tanba Autoridade Suku lima hamutuk ho Autoridade Postu dirije pedidu ba MJDAK no hetan apoiu fundu hodi realiza jogu refere.
“Ami realiza kompetisaun jogu entre suku 5 iha Postu Matebian, kompetisaun ida nee laos atu hadau buat boot ida maibe nia objetivu oinsa amizade entre Suku 5 neebe eziste iha Postu Matebian, tanba Postu nee foun oinsa jovem hametin nia relasaun ho diak kria unidade no pas,” hateten Nuno Florindo liu husi diskursu iha seremonia abertura jogu komunitariu, neebe realiza iha kampu futebol Postu Matebian, Sabadu (23/08/2025).
Nia sublina, jogu nee husi planu Autoridade Suku no Postu ba objetivu atu kria lasu amizade entre jovem sira husi Suku Laisorulai de Baixo, Laisorulai de Cima, Lelalai, Abo no Maluru, tanba Suku 5 refere foin haketak aan sai Postu foun ida iha Munisipiu Baukau.
Nia fundamenta, aliende mos jogu refere atu dezenvolve jovem sira nia talentu desportiva liu liu futubol nian nomos jogu refere nuudar animasaun ida husi komemorasaun loron FALINTIL ba dala 50 nian, tanba nee jogu tenke displina.
“Jogu tenke disiplina no tau espiritu nasionalismu no patriotizmu, tanba jogu ida nee laos jogu ida baibain maibe komemorasaun ba 50 anos FALINTIL, ba orsamentu neebe mak apoiu ba jogu ida nee US$ 1,240, maibe nee la boot ida nee animasaun, tanba Postu foun,” Nuno Florindo akresenta.
Nunee mos Lideransa Komunitariu Julio Farkhus Pinto konsidera, jogu komunitariu refere importante, tanba bele transforma jovem sira hodi aumenta kapasidade iha area desportiva liu-liu mundo futebol nian.
Xefe Suku Laisorulai de Cima nee katak, jogu komunitariu refere mos parte ida atu prepara fini futebol nian husi joven sira hodi ba kompete iha eventu Munisipiu no Nasional bainhira akontese, tanba dadaun joven sira husi Postu Matebian barak mak inklina aan iha klube sira iha nasional hanesan klube LSFCL no klubu Unidade 6.
Reprezentante Jogadores, Pedro da Costa Carvalho husi Suku 5 nee sente kontente, tanba Autoridade bele inisia jogu komunitariu refere neebe nuudar pasu importante ba jovem sira atu hametin lasu amizade iha Postu Administrativu Matebian.
“Hau lori jovem sira husi Postu Matebian ami sente kontente, tanba ami nia Autoridade loke jogu, hanesan jogadores ami hadia diak liu tan hametin ami nia unidade, pas no estabilidade iha Postu Matebian,” Pedro espresa.
Entretantu jogu komunitariu nee abertura husi Administrador Postu Matebian hamutuk ho Segundu Komadante Komando Polisia Munisipiu Baukau no reprezentante Prezidente Autoridade Munisipiu Baukau neebe hetan partisipasaun masimu husi komunidade sira.
(tom)
