DILI, STLTIMORLESTE.com – Evita movimentu livre iha areador Eskola Sekundariu Jeral nu. 4 Setembru Balide, inan aman sira kontribui lori kalen ba eskola.
Tuir Diretor ESJ nu. 4 Setembru Balide, Sergio A. da Cruz dehan, lo-loos nee bele halo moru, maibe eskola labele halo moru, tanba tenke identifika lo-loos rai eskola nian nee too iha neebe. Nee mak durante nee komunidade sira sempre halo movimentu livre iha areador eskola nian, maibe ho kontribuisaun inan aman sira nian lori kalen didin netik, para evita ema lao ba iha resintus eskola nian.
“Problema neebe mak eskola nee enfrenta mak ita hotu hatene katak, tinan-tinan sempre akontese inundasaun iha tempu udan. Agora kona-ba movimentu livre komunidade sira nian iha areador eskola hau bele dehan la akontese ona, tanba foin daudaun nee liu husi kontribuisaun inan aman hodi didin ho kalen bondes tau ho arame kroat. Neebe ami bele dehan movimentu livre entre komunidade ho estudantes sira la akontese ona,” dehan Sergio ba STL iha nia knaar fatin Balide, Segunda (25/08/2025).
Nia sublina, bainhira ema halo movimentu tun sae, nee prejudika mos ba iha prosesu aprendizajen, maibe agora ema lao ba mai laiha ona, tanba lori kalen didin tiha ona, liu husi enkontru mak inan aman sira fo kontribuisaun.
Nunee mos Estudante Luisa da Costa Martins hatete, uluk komunidade sira lao livre iha sira nian eskola, no komunidade loke kios iha sira nian areador eskola, atu nunee estudantes sira labele sai ba liur.
Nia dehan, agora lori kalen didin ona no komunidade sira la tama sai iha areador eskola nian.
(jac)
