DILI, STLTIMORLESTE.com – Juiz sira neebe atu ba tur iha Tribunal Rekursu (TR) no Supremu Tribunal Justisa (STJ), tenke liu husi konkursu.
Tuir Prezidente Asosiasaun Majislatura Judisial Timor Leste (AMJTL), Antoninho Gonsalves katak, Juiz sira neebe sei ba tur iha TR no STJ laos foti deit, maibe liu husi konkursu.
“Tenke konkursu, oras nee dadaun Juiz Segunda klasse iha nain 6, sira seluk nee terseira klasse, tanba nee sei loke konkursu atu sira terseira klasse sae ba segunda klasse, no sira segunda klasse ba fali iha primera klasse,” dehan Antoninho ba STL iha Kaikoli, Segunda (25/08/2025).
Nia hatete, atu sai Juiz Dezembargador iha Tribunal Rekursu, no Juiz Konselleru iha Tribunal Supremu da Justisa, tenke liu husi konkursu. Iha lei foun nee atu ba tur iha Tribunal Rekursu ho Juiz nain 9, no tur iha supremu Tribunal Justisa ho Juiz nain 7, maibe nain 9 iha TR nee Juiz los deit, Jurista labele tama iha neeba, maibe sira hotu liu husi konkursu.
Nia katak, banhira iha ona Juiz sira iha TR ho kareira primera klasse sei loke fali konkursu ba iha STJ ho autor judisial nain 7, maibe husi numeru nee Juiz nain 5 ho kareira primera klasse, no Jurista nain 2 husi Prezidente no Parlamentu maka hili.
Juiz neebe sei tuir iha STJ tenke primera klasse, no liu husi konkursu, tenke ho valor muito bom, tanba nee tenke liu husi konkursu.
Nia hatutan, tribunal halo deit planu hanesan presija vaga 4 ba primera klasse, maibe autoriza atu loke maka Ministeriu da Justisa, maibe atu autoriza MJ husu lai ba iha Ministeriu Finansas, no MF maka sei fo resposta iha orsamentu atu loke konkursu ba Juiz segunda klasse nain tolu ka nain lima, tanba hare ba orsamentu. Kuandu MF konfirma lolos ona konaba orsamentu, maka MJ sei haruka fali ba iha Tribunal hodi loke konkursu.
Iha fatin ketak, Prezidente Tribunal Rekursu, Afonso Carmona dehan, planu hari Supremu Tribunal Justisa iha tinan oin, no agora tama hela iha faze atu hare konaba prosesu Juiz sira atu ba tur iha TR no STJ.
“Orsamentu tama nee atu hadia Tribunal tuan, hodi instala ba Supremu nian nee, “dehan nia.
Nia hatutan, hari STJ hahu inisiu maka iha fulan hirak liu ba realiza ona seminariu hodi rona hanoin sira, no Governu mos aprova ona kalendariu komesa organiza ona, liu husi planu orsamentu nian.
Nia esplika, oras nee dadaun tama hela iha faze identifikasaun ba Juiz sira, se maka bele ba tur iha STJ hodi hare konaba servisu neebe iha, maibe konaba pedidu orsamentu nian hatama hotu ona, tanba Juiz sira halao knar iha TR no STJ sei iha mudansa ba salariu.
Juiz sira atu ba tur iha STJ halo selesaun ba sira, tenke hatama sira nia kurikulum vitae, no atu hili Juiz se deit maka ba tur iha STJ, Konselu Superior Majislatura Judisial (KSMJ) maka sei deside.
Carmona dehan, Juiz sira atu ba tur iha TR no STJ laos foti deit, maibe sira hatama tiha sira nia dokumentus, no liu husi selesaun rigorozu.
(ter)
