BAUKAU, STLTIMORLESTE.com – Prosesu reabilitasaun estrada urbana Baukau Vila labele koalia deit, maibe tenke implementa ona, tanba daudaun kondisaun difikulta movimentasaun transporte publiku no privadu.
Prezidente Konselhu Kombatentes Munisipiu Baukau, Fernando Beredu’u Gusmão haktuir, iha semana hirak liu Ministru Obras Publikas deklara ona ba publiku katak, prosesu reabilitasaun estrada urbana Baukau Vila sei halo hikas levantamentu dadus hafoin implementa progresu fiziku, maibe too ohin loron seidauk iha rezultadu.
“Liu husi meius ida nee hau hakarak husu Ministru Obras Publikas tenke haree estrada urbana iha Baukau laran nee tinan ida nee tenke lao, tinan ida nee mak la lao nafatin hanesan nee entaun sira koalia mak ibun mamar, maibe halo nee difisil, nee mak hau husu obras Publikas tenke hanoin ho ida nee,” hateten Beredu’u ba jornalista STL iha Vila Antiga, Baukau, Tersa (26/08/2025).
Nia husu Ministeriu Obras Publikas labele koalia deit maibe tenke implementa ona, tanba kondisaun estrada urbana husi Vila Antiga too Vila Nova dadaun nee kondisaun aat difikulta movimentasaun transporte publiku no privadu sira neebe husi vila antiga ba Merkadu foun Tuanaun ka Merkadu Munisipal.
Iha sorin seluk, Padre Parokia Sagrada Coração de Jesus Vila Nova Baukau, Benediktus Randung hateten, estrada husi Munisipiu Baukau ba Postu hahu diak ona, tanba hetan ona reabilitasaun enkuantu iha Baukau Vila husi Vila Nova too Vila Antiga, dadaun nee kondisaun aat no grave.
“Estrada nee tenke diak, tanba povu nia produtu atu lori mai faan iha vila prezisa estrada entaun estrada nee importante atu nunee fasilita ekonomia, se estrada la diak nee problema ba ita ekonomia ita nia rai laran bele la lao, maibe bainhira estrada diak ekonomia lao,” katak Pé. Randung.
Entretantu estrada urbana iha Baukau Vila husi Vila Antiga too Vila Nova no kontinua too, iha area Nagardo diresaun ba Kapital Dili hamutuk kilometru 23.
(tom)
