DILI, STLTIMORLESTE.com – Daudaun nee moras ISPA mak numeru aas iha Sentru Saude Komoro hamutuk 33.346 pasiente neebe halo tratamentu.
“Ita rejistu moras ISPA iha Sentru Saude Komoro nee pasiente hamutuk 33.346, nee ita haree numeru neebe aas, maibe ita sempre fo tratamentu neebe diak ba sira,” hatete Xefe Sentru Saude Komoro, Emilia Ayati de Sousa ba jornalista sira iha nia knaar fatin, Tersa (26/08/2025).
Nia dehan, aimoruk ba moras ISPA sufisiente atu fo ba pasiente sira, maibe mos lao tenke uza maskra, tanba daudaun nee rai rahun makaas iha fatin-fatin.
“Ita mear, inus metin nee impaktu mai husi rai rahun, tanba moto saude hatete katak, saude iha ita nia liman rasik, nee ita persiza halo prevensaun uza máskara wainhira lao ba fatin ruma,” nia deklara.
Iha fatin hanesan, Pasiente Suzana Soares da Silva informa, moras ISPA daudaun nee iha fatin-fatin sempre iha, tanba mai husi klima, hanesan rai rahun, ambiente neebe la moos.
“Moras ISPA nee agora ita kona hotu mear, inus metin, isin manas, ulun moras, tanba klima, agora rai manas no rai rahun iha fatin-fatin, ida nee mak halo ita hetan moras nee, hau moras loron 4 ona ohin mai konsulta hodi simu aimoruk iha Sentru Saude Komoro,” nia deklara.
Nia informa, ohin konsulta koko tensaun, nomos konsulta depois mai iha Farmasia simu aimoruk mear nian nomos isin manas nian.
“Aimoruk iha, tanba nee ohin hau konsulta simu kadas aimoruk, kona-ba atendimentu iha Sentru Saude ida nee lao diak tebes,” nia afirma.
(jen)
