AMBENO, STLTIMORLESTE.com – Ekipa konjunta husi Polisia Sientifika Investigasaun Kriminal (PSIK) ho Servisu Nasional Intelejensia (SNI), iha loron Segunda kalan (25/08/2025), tuku 21:00 Oras Timor Leste (OTL), desmantela redi Internasional Scam Call Center iha zona Sudeste Aziatiku neebe instala iha Otel Oeupun inklui jogu Online neebe buska no apreensaun ba ema no sasan ho evidensia hanesan komputador, Laptop ho Telefone neebe uza halo atividade jogu online.
Hanesan ita boot sira hatene katak, PSIK halo inspeksaun ba iha fatin neebe durante nee ita observa katak iha atividade ilisitu kriminoza, no iha inspeksaun nee ita identifika katak iha aktividades criminal 2, hanesan explorasaun ba jogu ilisitu no burla informatika, ida nee iha ligasaun ho dehan Redi Scam Call Center trans Nasional neebe durante nee opera iha zona Asian nian. Iha jogu ilisitu nee, ita halo aprensaun ba desktop ho total 27 unidade, Laptop 13, Telemovel 194, Flash Disk iha 3, Acces point Wifi, iha ida nomos starling Router iha 2. Ita mos halo aprensaun ba simcar Telkomcel indonezia nian nee iha 135 neebe sira utiliza ba jogu ilisitu nian,” dehan Investigador Xefe PSIK, Dedi Alvaro da Silva ba STL iha Otel Oepun, Aldeia Sanane, Suku Costa, Postu Administrativu Pantemakassar, Rejiaun Administrativa Espesial Oecusse-Ambeno (RAEOA), Tersa Kalan (26/08/2025).
Nia haktuir tan katak, sasan neebe prende iha burla informatiku nee iha halo aprensaun ba desktop 58, laptop 4, Impresora 1, makina sura osan ida, acces point nee 2, nomos telemovel iha 44.
Responde kona ba sidadaun estranjeiru neebe hola parte iha atividades redi internasional Scam Call Center nee uza vistu turizmu ka vistu trabalhu katak, ida nee sei iha prosesu identifikasaun neebe normalmente sei iha fralante de interogatoriu, neebe sei ba iha primeiru interogatoriu judisial.
“Ita desmantele redi kriminozu trans nasional ida neebe konhesidu iha zona area ASEAN nian, sei ita boot sira akompanhia karik, iha Myanmar iha fulan Fevereiru liu ba, depois mai iha Cambodia no ikus liu maka iha Filipina, neebe iha ita nia fatin mos ita identifika katak, afinal sentru nee instaladu tiha ona iha ita nia rai, neebe ohin ita halo desmantela ba iha atividades ida nee,” dehan nia.
Informasaun neebe STL rekolha iha Otel Oeupu, RAEOA Tersa kalan (26/08/2025), autoridade PSIK ho SNI kontinua halo buska, apreensaun no detesaun ba sidadaun lokal balun hudi Oecusse no Dili nunere mos sidadaun estranjeiru husi nasaun Indonezia, Malazia no Singapura, envolve iha atividade jogu online no Scam Call Center neebe instala no halao ona atividades ilisitu iha Oekusi.
Bainhira parte SNI ho PSIK halo operasaun deskonfia parte balun informa ona ba parte sira iha Otel Oeupu, tanba nee bainhira ekipa konjunta too halo operasaun, kuaze deteta material prinsipal sira neebe fasilita jogu online, inklui parte jestor ho investor prinsipal sira la iha fatin tanba antes nee sira hamamuk ona Otel Oeupu.
Iha Segunda kalan, bainhira ekipa konjunta halo hela identifikasaun ba pesoal sira iha Otel Oeupu ba sidadaun estranjeiru sira, derrepente deit ahi eletrisidade mate no deskonfia trabalhador sira iha laran mak orienta malu taka ahi hodi halo barulha situasaun nee, hodi sira sai husi fatin nee, maibe ekipa PSIK kontinua rekolha informasaun ba kada pesoal trabalhador husi estranjeiru no konsege identifika autor prinsipal neebe taka ahi derpenti nee.
Iha mos insidente balun neebe parte PSIK uza forsa hodi halo intimidasaun tanba individu balun la koopera no tenta sabotaze prosesu identifikasaun no investigasaun.
Ekipa PSIK ho SNI halo operasaun iha Otel Oeupu, laiha konhesimentu ba Prezidente Autoridade RAEOA no halo buska iha tempu kalan no la aprezenta mandadu ruma husi Tribunal.
Too tuku 01:30 kalanboot, ekipa PSIK telefoni fali ba ekipa EDTL RAEOA, too kedas fatin operasaun (Otel Oe-Upu) hodi loke fila fali ahi eletrisidade no ekipa SNI ho PSIK kontinua asegura trabalhador sira tantu timoroan no estranjeiru iha sala servisu hodi hein aprezenta ba Ministeriu Públiku.
Iha fulan Julhu 2025, empreza Internasional Seagull Resort husi Malazia, arrenda Otel Oeupu ba tinan-50 ho kustu arrenda nian milhaun US$ 9 atu loke jogu online iha Oecusse, neebe Prezidente Autoridade RAEOA, Rogerio Tiago Fatima Lobato tempu neeba deklara katak, jogu online nee Governu Sentral mak sei hasai lisensa tanba nee parte RAEOA halo koordenasaun ho Visi Primeiru Ministeriu ba Asuntu Ekonomia, Ministru Turizmu no Ambiente atu bele fo lisensa hanesan baze legal ba atividade jogu online nee.
(jos)
