DILI, STLTIMORLESTE.com – Prezidente Republika (PR), Jose Ramos Horta destake pozisaun Timor Leste (TL) nuudar parseria konfiavel iha kuadru ASEAN no iha rejiaun Sudeste Aziatiku neebe luan liu.
Durante ninia vizita ofisial iha Japaun, Prezidente Republika Jose Ramos Horta, iha loron 26 fulan Agostu 2025, halo entrevista nivel aas ho media prinsipal Japaun nian, NIKKEI no NHK, hodi esplika vizaun estratejika Timor Leste nian.
Xefe Estadu deskreve futuru ida ho parseria ekonomika neebe klean, hodi sublina oportunidade sira ba investimentu iha setor xave sira no haforsa pozisaun Timor-Leste nian nuudar parseiru estavel no konfiavel iha kuadru ASEAN no iha rejiaun Sudeste Aziatiku neebe luan liu.
Entre tema sentral sira, destaka projetu markante neebe envolve kompania boot Japaun nian ida atu estabelese estaleiru naval ida iha Timor Leste, inisiativa neebe preve ho objetivu atu kria kampu serbisu rihun ba rihun no fo formasaun ba enjeneiru timoroan sira iha Japaun. Inisiativa ida nee, hamutuk ho dezenvolvimentu kampu Greater Sunrise no apoiu krusial husi Japaun ba RTTL (Radiu no Televizaun Timor Leste, Empreza Publika), aprezenta nuudar pilar fundamental ba estratejia dezenvolvimentu sustentavel. Prezidente sublins katak projetu sira-nee hatudu benefisiu konkretu husi relasaun bilateral neebe forte, neebe harii bazeia ba konfiansa mutua no objetivu komun.
Iha entrevista ho NHK, Prezidente Republika Ramos Horta koalia mos kona-ba kestaun seguransa rejional, Prezidente klarifika katak kooperasaun militar Timor-Leste nian ho Xina foka ba asistensia teknika no haforsa kapasidade defeza iha kuadru transparensia no laos provokasaun nian. Xefe Estadu afirma katak parseria internasional hotu-hotu dezenvolve atu apoia dezenvolvimentu nasional no kontribui ho modu konstrutivu ba pas no estabilidade rejional, hodi sublina kompromisu metin Timor Leste nian atu sai ator responsavel ida neebe dedika ba kooperasaun iha Sudeste Aziatiku.
(ter)
