DILI, STLTIMORLESTE.com – Sekretariadu Komisaun Rekrutamentu Ajente Polisia Nasional Timor Leste (PNTL) tinan 2025 anunsia kona-ba kandidatu husi munisipiu sira inklui RAEOA, neebe asesu ona ba formulariu hamutuk 17.148. Husi numeru nee membru PNTL nia oan nain 556 no veteranus nia oan nain 835.
Hatete Portavos Komisaun Rekrutamentu Membru Polisia Foun, Superintendente Polisia Antonio da Luz ba jornalista sira liu husi Konferenesia Imprensa iha Sentru Formsaun Polisia (SFP), Komoro, Kuarta (27/08/2025).
Nia dehan, sekretariadu hakarak fo sai ba publiku konaba total kandidatu sira neebe simu formulariu nomos sira neebe intrega ona sira nia dokumentus ba ponto fokal iha munisipiu ida-idak nian.
Nia tenik, kandidatu sira neebe mak simu ona formulariu rekrutamentu nian hahu husi loron 05 too 25 Agostu 2025 hamutuk kandidatu 17.148, husi sira nee konsidera katak, sira nee mak liu ona admisaun katak, sira neebe aptu.
Nia esplika, iha nee mos kandidatu neebe mak la liu ka la aptu katak, sira nia idade neebe liu no alturas neebe mak la too hamutuk nain 4.702. Ida nee sira neebe mak la aptu hahu husi asesu ba formulariu iha loron 05 too 25 Agostu tinan nee.
“Husi total kandidatu hirak nee, sira neebe mak submete ona fali dokumentus ba iha pontu fokal iha munisipiu idak-idak hamutuk nain 4.428. Iha nee ita fahe ba kategoria tolu, ida jeral total hamutuk nain 3.37, Jerasaun Patriota nia oan 835 nomos filho ka oan husi membru PNTL nian hamutuk 556,” nia deklara.
Nia afirma, husi total dadus kandidatu sira neebe submete ona dokumentus nee, sidadaun babain ka dadus jeral mane hamutuk nain 2.254 no feto 783. Nomos Jerasaun kompatriota nia oan kompostu mane total 645 no Feto 190. Enkuantu oan husi membru PNTL kompostu husi mane 396 no feto 108.
Nia deklara, hamutuk kandidatu sira neebe mak submete ona dokumentus iha kada pontu fokal iha munisipiu ida-idak, inklui mos iha sentru formasaun hamutuk 4.428. Nunee aproveita fo hatene ba kandidatu sira, depois submete dokumentus iha loron 9 Setembru hosi ponto fokal sira iha munispiu sei lori dokumentus sira nee mai ba iha sekretariadu, atu halo verifikasaun ba iha dokumentus sira nee.
Nia koalia, kandidatu sira neebe submete ona dokumentus nee ho idade tuir kriteria nee 18 too 23 hotu deit, inklui sira nia alturas mos tuir hotu kriteria neebe mak iha nanis ona.
Nia informa, ida nee mak atu fo hatene ba kandidatu sira atu bele halo preparasaun. Husu mos ba kandidatu sira atu prepara ita nia fiziku, tanba selesaun sira nee uza sistema eliminatoriu, tanba nee husu ba kandidatu ida-idak tenki prepara aan didiaak. Iha ezame mos hanesan se mak la pasa iha ezame sei la hakat tan pasu sira seluk, tanba iha teste primeiru ezame eskrita, depois se mak pasa sei ba iha teste fiziku no teste sira seluk.
Nia hateten, selasaun ba kandidatu sira hanesan deit, laiha espesial ba membru polisia nia oan ka veteranus nia oan. Tanba ne’e husu para ida-idak prepara hodi bele kompete iha selesaun nee.
“Hau atu dehan, iha selesaun prova kultural sei halo iha munisipiu idak-idak. Maibe ba selesaun prova fiziku mak halao iha Sentru Formasaun Polisia Akademia Komoro Dili no sira seluk halao hotu iha Dili,” nia haktuir.
Nia hatutan, Inspetor sira neebe mak sei halo monotorizasaun nee mai sei miksu, hosi GNR Portugal neebe apoiu iha Sekretariadu nomos Ekipa monotorizasaun neebe mak sei nomeia hosi Ministru Interior, atu bele halo fiskalizasaun ba iha prosesu sira nee hotu too konklui final.
Nunee mos Kandidatu ba PNTL foun Lorencio Viana Gomes informa, formulariu prense ho hatama hotu ona, hein rejulta hodi tuir etapa tuir mai, maibe kriteria neebe fo sai iha media susar ka difisil tebes ba kandidatu idak-idak.
(jen)
