BAUKAU, STLTIMORLESTE.com – Eskola Ensinu Sekundaria Jeral (ESJ) 01 Tirilolo iha Postu Administrativu Baukau Vila, Munisipiu Baukau, menus livru manual ba estudante sira.
Diretor Eskola Estevão Ximenes Gusmão hateten, prosesu aprendizajen iha Eskola ESJ 01 Tirilolo lao ativu tebes tuir orariu neebe Ministeriu Edukasaun estabelese, maibe estudante sira enfrenta mak livru, tanba livru manual ba estudante sira menus atu empresta lori ba uma hodi estuda.
“Iha ami nia eskola menus mak livru ba terseiru anu sira nian iha maibe ladun barak ligadu ba materia espesefiku sira ba CT no CSH. Livru ba estudante primeiru no segundu anu nee sufisiente,” hateten Estevão ba jornalista STL iha knaar fatin Tirilolo, Tersa (26/08/2025).
Nia sublina, livru ba estudante neebe menus liu Eskola ESJ 01 Tirilolo mak hanesan Melayu, Desportu no materia espesifiku balun ba estudante area estudu CT no CSH, tanba livru neebe antes Ministeriu Edukasaun apoiu, parte eskola apoiu tutan ba eskola filial no paralelu, tanba husi eskola refere mos menus livru ba estudante sira.
Nia fundamenta, mezmu eskola sentral rasik enfrenta menus livru ba estudante, maibe sei iha livru ba estudante sira atu impresta hodi estuda iha uma nee sufisiente hodi estudante sira asesu prepara ba ezame Nasional no Lokal.
“Ami nia total estudante finalista hamutuk 423, livru neebe iha atu fo ba sira nee la too 400, nee iha impaktu boot,” Estevão akresenta.
Nia argumentu, preokupasaun refere antes nee parte eskola relata ona pedidu ba Servisu Lojistiku Edukasaun Munisipiu Baukau hodi apoiu livru ba eskola atu fahe ba estudante sira estuda prepara ba ezame, maibe too ohin loron seidauk fo apoiu.
Liga asuntu nee STL tenta konfirma Diretor Servisu Munisipal Edukasaun Baukau, Afonso dos Santos da Costa, maibe laiha fatin atu fo resposta, tanba sei tuir enkontru importante iha Nasional.
Entretantu Eskola ESJ 01 Tirilolo Baukau rejista total estudante feto mane hamutuk 1.307 kompostu desimu primeiru too dezisaun terseiru klase.
(tom)
