DILI, STLTIMORLESTE.com – Sekretariu Jeral Partidu FRETILIN, Mari Alkatiri hatete, ligadu ho problema Fronteira entre Timor Leste ho Indonezia atu halo rekonsiliasaun nee kompleksu, tanba familia vizinhu rua iha relasaun Familia tenke rezolve tuir kultura uma lisan.
Sekretariu Jeral Partidu FRETILIN, Mari Alkatiri hatoo kestaun nee ba jornalista sira iha nia knaar fatin Farol, Kuarta (27/08/2025).
Ni hatete, uluk nia mandatu tinan 5 iha Oekusi laiha problema, agora mosu fali problema ida nee halo nia hakfodak.
“Hau hakfodak fali, hau iha neeba tinan 5 laiha problema iha Fronteira, agora ba balun atu entrega tiha naktuka la entrega agora problema foun mosu fali, saida mak ita halo sala, hau tinan 5 iha neeba hau laos halo negosiasaun Fronteira tanba laos kompetensia hau nia, maibe hau estabele relasaun diak ho sira sorin ho Governador ami nain rua diak malu,” dehan Eis PM Mari Alkatiri.
Eis PM hatete, relasiona ho problema nee, Mari dehan lalika koalia demais, seidauk bele halo, labele koalia demais, enkuantu seidauk bele halo.
“Hau dehan atu halo rekonsiliasaun iha Fronteira nee rekonsiliasaun ida kompleksu tebes, tanba familia sorin ba no familia husi sorin mai uma lisan ida deit, entau sasan hotu tenke rezolve uluk uma lisan, problema ekonomiku sosial iha Fronteira labele konfundi ho baliza, hau koalia buat sira nee hotu, tanba baliza nee mak ita indepedente, agora ida nee tama tan 200 metru ba laran nee nia prozesaun ba tasi nee laos 200 metru nunee,” dehan Mari.
Iha biban nee Sekretariu Jeral FRETILIN, Mari Alkatiri dehan, nia la konkorda nasaun rua bolu halo rekonsiliasaun, tanba nee Mari propoin muda naran Komisaun Verdade e amizade.
“Lialos atu bele hotu-hotu hatene saida mak akontese atu sai amigu nee halo nusa, hau mak propoin ida nee,” Katak Mari.
Mari dehan, servisu Visi Ministru Kalbudy Lay neebe tutela ba Turizmu serbisu la lao, tanba nia sai fali Turista tanba lao la para, depois mak organiza festa ida nee sai kampiaun.
“Ita Konhese malu tanba nia uluk FRETILIN, uluk nia FRETILIN sai husi FRETILIN tanba la konsege sae too Ministru,” katak nia.
Turizmu seidauk lao enkuantu seidauk hadia problema saneamentu, bee moos, enkuantu seidauk hadia sistema saude, no turista sira hanoin dala rua dala tolu atu mai vizita.
(eme)
