DILI, STLTIMORLESTE.com – Iha loron 1 fulan Setembru tinan 2025, Komando FALINTIL-Forsa Defeza Timor Leste (F-FDTL) iha Komponente Navál inser Bandeira RDTL iha primeira semana neebe prezide husi Komandante Komponente Navál, Komodoro Higino das Neves iha Komponente Navál Hera.
“Obrigadu ba media, tanba mai kobertura ona ami nia primeira semana, ami dada bandeira iha ami nia Komponente Navál Hera,” hatete Komandante Komponente Navál, Komodoro Higino das Neves ba jornalista sira iha Komponente Navál Hera, Segunda (01/09/2025).
Iha ambitu nee Komodoro mos hatoo agradese ba Komandante Unidades ba asesor internasional sira, ba ofisial Sarjentu no ba Instutisaun haat neebe servisu iha Komponente Navál nian domin boot ba ita boot sira.
“Ita nia servisu ba oin sei barak liu, hau fiar katak ita boot sira kontinua servisu maka’as hodi servi ba ita rain no ba povu ida nee,” nia informa.
Nia deklara, ba membru F-FDTL tenke kumpri oras servisu no oras deskansa, ida nee orden Komponente Navál.
“Oras servisu tenke servisu, oras han tenke han, no oras deskansa tenke deskansa, nee orden, se mak viola hetan sansaun,” nia informa.
Entretantu iha ambitu inser Bandeira nee mos Xefe Estadu Maior Jenerál FALINTIL – Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” fo sai despaixu hodi hasai membru F-FDTL nain rua husi Komponente Naval, neebe reprezentante husi Komandante Komponente Navál, Komodoro Higino das Neves hodi hasai membru F-FDTL nain rua husi Komponente Naval, tanba halo relasaun adulteiru.
Jornalista: Jeniche da Costa
Editor: Xisto Mendonça
