DILI, STLTIMORLESTE.com – Prezidente Republika (PR), Jose Ramos Horta simu Doutor Honoris Causa husi Universidade Presbiteriana Mackenzie (UPM) Brazil.
Prezidente Republika Jose Ramos Horta simu titulu Doutor Honoris Causa husi Universidade Presbiteriana Mackenzie (UPM) iha Brazil. Onra prestijiozu nee aprezenta formalmente husi Reitor UPM, Profesor Marco Tullio de Castro Vasconcelos, iha Palasiu Prezidensial Nicolau Lobato, Segunda (01/09/2025).
Doutoramentu Honorariu mak onra akademika aas liu neebe universidade sira fo iha mundu tomak, rekonhese pesoal sira ho meritu esepsional no realizasaun durante moris tomak iha area sira hanesan pas, kultura, siensia no polítika.
Onra nee selebra Prezidente Ramos Horta nia dedikasaun durante moris tomak ba servisu publiku, inklui ninia papel sira uluk nuudar Primeiru Ministru no Ministru Negosiu Estranjeiru. Nia sai nuudar figura sentral ida iha luta diplomatika ba independensia Timor Leste nian no hetan premiu Nobel Pas iha tinan 1996 ba ninia kompromisu neebe boot tebes ba rezolusaun ida neebe justu no pasífiku atu rezolve konflitu.
Iha biban nee Prezidente Ramos Horta hatoo ninia agradesimentu klean ba universidade neebe renomadu ida laos ba pesoal maibe mos nuudar rekonhesimentu ba povu Timoroan.
“Hau sente haksolok no onradu simu distinsaun ida nee husi instituisaun ida neebe renomadu no istoriku. Onra nee laos deit ba pesoal, maibe mos nuudar rekonhesimentu ida ba povu Timoroan nia reziliensia no espíritu neebe dura. Ida nee hametin lasu amizade no solidariedade entre ita nia nasaun sira no destaka valor universal sira edukasaun nian, pas nian no dignidade umana neebe ita hotu hakaas aan atu tane aas,” dehan PR Horta.
PR dehan, onra nee mos sublina parseria akademika neebe klean entre UPM no Timor Leste. Durante tinan 23 liu, UPM parseria ho Universidade Nasional Timor Leste (UNTL) hodi hametin lian português no dezenvolve kapasidade akademika.
Kooperasaun ida nee inklui projetu alfabetizasaun, formasaun dosente, interkambiu peskiza, no inisiativa linguístika sira.
Marku importante ida mak foin lalais nee kompleta doutoramentu inter-institusional (DINTER) husi dosente UNTL nain 13.
Universidade Presbiteriana Mackenzie neebe lokaliza iha São Paulo, hanesan instituisaun edukasional ida neebe prestijiozu no tradisional liu iha Brazil, neebe rekonhese ba ninia exelensia akademika no edukasaun bazeia ba valor sira.
Jornalista: Emerenciana Pinto
Editor: Xisto Mendonça
