BAUKAU, STLTIMORLESTE.com – Folin nesesidade bazika daudaun implika ba komunidade agrukultores sira neebe hela iha area romatas, tanba folin karun difikulta komunidade uma kain hamutuk 114 iha Suku Ossu-huna, Postu Administrativu Baguia, Munisipiu Baukau, labele sosa foos hodi konsumu, neebe nia fukun lo-loos husi kondisaun estrada ba Suku Osso-huna grave.
Xefe Suku Ossu-huna Paul dos Reis Peidade hatete, folin sasan nesesidade bazika iha Suku Osso-huna hanesan foos marka tuna, ikan mas no globus kilograma 25 ho folin US$ 16.50 kada saka no mina tein jereken litru 5 ida folin US$ 7.50 no litru 3 kada masa US$ 3.50 neebe dadaun implika ba komunidade menus rendimentu sira, tanba labele sosa foos no mina refere.
“Hau hanoin difikulta tebes tanba nia folin sae, fos iha kapital folin tun maibe tan deit estrada aat faan sasan sira nee mos hasae folin ba beibeik,” hateten Paul ba jornalista STL liu husi telefone, Tersa (02/09/2025).
Folin foos tuir nia implika ba komunidade sira, tanba maioria komunidade iha Suku Osso-huna moris ho atividade Agrukultura neebe lori rezultadu produtu ba merkadu lokal sira hanesan koto, feuk, talas no seluk tan hafoin hetan rendimentu osan hafoin sosa fos hodi ba uma, maibe kuandu produtu lokal hirak neebe la lori ba merkadu la sosa komunidade sira tenke lakon rendimentu no laiha finanseiru hodi sosa foos no seluk tan.
Tanba autoridade Suku nia identifikasaun kona-ba uma komunidade sira hotu liu liu komunidade servisu agrukultura balu laiha duni rendimentu hodi sosa foos, tanba produtu lokal hirak neebe lori ba merkadu lokal ema la sosa no obrigatoriu tenke konsumu deit produtu lokal.
“Se la sosa foos pasiensia moris ho produtu lokal, tanba vuneravel liu labele duni hetan foos neebe agora ami rejista uma kain 114,” Paul akresenta.
Lideransa Komunitariu nee deklara, husi uma kain 114 rejistu ho membru familia sira neebe tuir planu parte Suku sei submete ba Ministeriu Solidariedade Sosial no Inkluzaun hodi fo apoiu nesesidade bazika, tanba durante nee komunidade uma kain refere moris iha difikuldade laran.
Nia salienta, uma kain hirak nee moris ho kondisaun nunee, tanba lori produtu lokal ba merkadu lokal ema la sosa neebe kauza husi estrada laiha negosiante no komunidade husi fatin seluk too fatin refere hodi sosa sira nia produtu.
No seluk tan mak hanesan sira iha osan natoon atu sosa foos, maibe osan neebe sira iha la too, tanba kondisaun estrada aat difikulta movimentasaun transporta sasan nesesidade bazika ba Suku refere ho presu karun.
Nunee husu Governu liu husi Ministeriu Obras Publikas atu tau atensaun kondisaun estrada husi Postu Baguai ba Suku Osso-huna, tanba dadaun kondisaun aat implika folin nesesidade bazika folin sae afeta negativu ba povu kbiit laek sira nia moris.
Jornalista: Tomas Reis
Esitora: Carme Ximenes
