DILI, STLTIMORLESTE.com – Ministeriu Turizmu Ambiente (MTA) liu husi Autoridade Turizmu Timor Leste (ATTL) IP, parseira ho Governu Japaun liu husi Japaun International Cooperation Agency (JICA) realiza seminariu kona-ba padraun The Association of Southeast Asian Nations ( ASEAN) turizmu nian.
Prezidente Autoridade Turizmu TL, Virgilio Smith dehan, workshop nee hanesan fase primeiru hodi koalia kona ba TL nia preparasaun tama ba turismu ASEAN, hodi konvida operador ekonomiku sira mai partisipa no koalia kona ba estandar padraun sira neebe tama ba iha ASEAN.
“Ita hamutuk iha nee hodi diskute oinsa bele promove setor turizmu iha TL nia preparasaun sai membru ba ASEAN iha kompromisu hodi implementa regra hitu neebe mak hola parte iha ASEAN,” dehan Virgilio Smith ba jornalista sira iha salaun MNEK, Tersa (02/09/2025).
Nia haktuir, enkontru nee koalia kona-ba regra estabelesimentu iha area negosiu hanesan restaurante, kafetaria liu-liu kualifikasaun ba hotel sira neebe maka iha, hodi bele tama iha estandar ASEAN nian.
Tanba nee mak konvida operador sira maka mai para hare hotel sira nee hanesan soldajen sira atu foti dadus neebe real hodi bele informa ba iha ASEAN turismu neebe kualidade.
Entretantu Visi Prezidente JICA, Mataeda Mikio hatete,” ohin seminariu kona ba padraun ASEAN Turismu nia, hau haksolok tebes haree kolaborasaun entre JICA, Ministeriu Turizmu, no MNEC, ho apoiu inestimavel husi Indonesia hodi organiza eventu ida nee ba Timor Leste, nasaun promisidor neebe hetan bensaun ho patrimoniu kultural neebe riku, beleza natural neebe uniku, no liu-liu, ema ho hamnasa neebe nabilan, dezenvolvimentu turizmu ida neebe sustentivel sei kria oportunidade foun, partikularmente ba jerasaun foin sae sira,” dehan nia.
Nia katak, Japaun durante nee apoia TL nia setor turizmu liu husi inisiativa sira, inklui programa bolsa estudu JDS, JICA nia programa formasaun no projetu infraestrutura inklui iha aeroportu internasional, no Programa Formasaun Estajiariu Tekniku (TITP), neebe permite formandu Timor-oan sira atu hetan esperensia pratika iha industria.
Jornalista: Joaninha Belo
Editora: Domingas Gomes
