DILI, STLTIMORLESTE.com – Governu Australia apoiu milhaun US$ 22 ba Sekretaria Estadu no Igualdade (SEI) ba iha Programa Nabilan, atu apoiu dezenvolvimentu iha area igualdade jeneru nian iha Timor Leste (TL).
Liafuan nee hatoo husi Embaisador Australia iha TL, Edward Wilkinson Charge d’Affaires ba jornalista sira iha Salaun Maria Goreti Kaikoli, Dili, Tersa nee (02/09/2025).
Embaisador Australia iha TL, Edward Wilkinson Charge d’Affaires dehan, Governu Australia kontente tebes, tanba hakat mai iha nee hodi asina akordu ho atanjamentu subsidiariu entre Governu Australia ho TL.
“Ohin nee atu kontinua servisu importante sira ba Programa Nabilan, ami kompromisu hodi apoiu osan milhaun US$ 22 ba SEI, ba iha tinan 5, asina akordu ho atanjamentu subsidiariu entre Governu Australia ho Governu TL,” dehan Edward Wilkinson Charge d’Affaires.
Nia dehan, programa nee importante tebes ho realizasaun Australia nia kompromisu atu apoiu dezenvolvimentu iha area igualdade jeneru iha TL ho Governu Australia.
Iha fatin hanesan, Sekretaria Estadu ba Igualdade (SEI), Elvina Sousa Carvalho hatutan, Programa Nabilan nee tama ona ba faze datoluk, dezde tinan 2014 too agora.
“Implementasaun nee laos foin hahu, implementador mak Asia Fundation neebe ho naran Programa Nabilan, osan neebe iha nee implementa ba tinan 5 nian,” dehan Elvina.
Nunee ohin Governu Australia no Governu TL investe implementasaun planu asaun nasional bazeia ba jeneru neebe adota hodi halakon no elimina kualker tipu violensia.
Sekretariu Estadu ba Igualdade (SEI) hatoo mos agradese ba Governu Australia nia apoiu ba iha SEI.
“Ami fiar katak ho asina akordu nee bele haforsa liu tan servisu SEI no mos IX Governu Konstitusional nian hodi kombate violensia bazea ba jeneru,” nia hakotu.
Jornalista: EST 1
Editor: Xisto Mendonça
