KELIKAI ANTIGU, STLTIMORLESTE.com – Projetu reabilita estrada husi Suku Afasa ba too area Darenafa Suku Namanei, Postu Kelikai Antigu, Munisipiu Baukau, neebe cor ho semente laiha kualidade, tanba hahu fera no rahun ona.
Rezidente Euofa, Suku Namanei Adelino João preokupa ho projetu reabilitasaun estrada neebe responsabiliza husi kompanhia lokal sira neebe hahu reabilita husi Suku Afasa too area Darenafa Suku Namanei ho tipu cor sementi, maibe laiha kualidade, tanba projetu refere seidauk too tinan hahu nakfera no rahun.
“Estrada nee seidauk too tinan, maibe balun nakfera ona i rai mos taka dalan movimentasaun lao mos la diak. Projetu nee laiha kualidade,” hateten Adelino ba jornalista STL, iha Darenafa, Kinta (04/09/2025).
Projetu tuir Adelino laiha kualidade, tanba parte kompanhia la konstrui valeta iha neebe tempu udan difikulta movimentasaun no labarik estudante lao ain sira husi uma ba eskola.
Maibe projetu nee kompanhia implementa ho valor orsamentu boot neebe aloka husi Ministeriu Obras Publikas ho intensaun, atu fasilita movimentasaun transporte hodi komunidade sira lori produtu lokal ba merkadu no seluk tan, maibe progresu fiziku la fo satisfasaun ba komunidade.
“Husi ami komunidade hakarak se bele karik Ministeriu Obras Publikas husu ba kompanhia hodi reabilita fila fali estrada nee, tanba gasta osan boot laiha kualidade,” Adelino espresa.
Nunee mos Xefe Suku Afasa, Joaquim Fernandes preokupa ho projetu refere, tanba sementi neebe parte kompanhia liu husi trabalhador sira cor laiha kualidade neebe dadaun hahu nakfera ona.
“Cor laiha kualidade duni, tanba sira kaur sementi nee la tuir rekezitu neebe iha mak estrada nee estraga fila fali nia kondisaun, ami preokupa tanba gasta orsamentu maibe halo ona tinan 2 ho balun maibe seidauk remata i estrada laiha kualidade,” hateten Joaquim.
Xefe Suku nee husu ba Servisu Munisipal Obras Publikas Baukau fo orientasaun ba kompanhia sira hodi finaliza projetu no responsavel ba estrada neebe cor ona, maibe hahu nakfera, tanba nee gastus orsamentu boot, maibe implementasaun laiha kualidade.
Liga asuntu nee Jornalista STL tenta konfirma Koordendor Tekniku Obras Publikas Destakadu Munisipiu Baukau, maibe laiha fatin atu fo komentariu.
Entertantu projetu nee implementa iha tinan 2022 ba durasaun servisu tinan ida husi Suku Afasa too area Darenafa hamutuk kilometru 6 fahe ba pakote 2 neebe responsabiliza husi kompanhia lokal Flores Unipesoal Lda ho valor orsamentu US$ 510,231.96 responde ba kilometru 3 no Helcia Unipesoal Lda ho valor orsamentu US$ 618,654.00, hodi reabilita estrada ho tipu cor no ateru, maibe servisu cor neebe parte kompanhia implementa hahu nakfera no rahun.
Jornalista: Tomas Reis
Editira:Carme Ximenes
