BAUKAU, STLTIMORLESTE.com – Habitante ka komunidade sira iha Suku Tirilolo, Postu Baukau Vila, Munisipiu Baukau, tinan naruk ona sosa bee moos hodi responde ba nesesidade loron-loron.
Habitante Tirilolo iha area Vila Nova Baukau, Geralda Neto Xavier konta, problema bee moos iha area Vila Nova tinan naruk ona, hahu kedas iha inisiu ukun aan too ohin loron, neebe kada semana sosa bee moos husi transporte bombeiru privadu sira hafoin utiliza, tanba durante nee seidauk asesu bee moos husi kanalizasaun publiku neebe BTL instaladu.
“Bee ami komsumu iha nee sosa deit tanki ida ami sosa US$ 12.0. Sosa bee nee kleur ona, tanba bee mak laiha,” hateten Geralda ba STL, iha Vila Nova Baukau, Kinta (04/08/2025).
Nia konta, osan US$ 12.00 ba bee moos ba litru 5000 nian hafoin utiliza ba nesesidade loro-loron nian, maibe utiliza too deit semana, tanba membru familia uma laran barak.
Nia espresa, kada semana lakon osan US$ 12.00 ba bee moos fo impaktu ba nesesidade ekonomia, tanba rendimentu neebe iha hodi sosa bee moos husi rezultadu negosiu kiik nian neebe menus tebes, maibe bee moos nuudar nesesidade importante obrigatoriu tenke sosa, tanba laiha bee moos gratuitu no folin baratu neebe oferese husi BTL.
“Hau husu BTL halo kanalizasaun ba ami,” Geralda rekomenda.
Iha sorin seluk, membru FONGTIL Crispin Malik preokupa ho area urbana Baukau Vila, neebe tinan naruk ona Autoridade relevante sira liu liu hanesan BTL seidauk kore komunidade sira husi kultura sosa bee moos, tanba komunidade balu asesu ona bee moos husi kanal BTL enkuantu balun seidauk no obrigado tenke sosa bee.
“Kona-ba bee mos iha urbana sei susar, tanba iha nee fahe ba fatin rua, Vila Nova Vila Antiga, iha Vila Antiga asesu bee moos husi bee matan Uailia, agora komunidade sira iha Vila Nova balun too agora sei susar ba bee, tuir lo-loos osan neebe komunidade sira iha halo ba buat seluk, maibe sosa bee fali,” katak Crispin.
Membru Sosiedade Sivil nee hateten, tuir lo-loos osan neebe komunidade sira iha investe ba nesesidade seluk hanesan sustenta ekonomia familia no sustenta oan sira nia eskola, maibe kestaun la asesu bee moos, tenke sosa bee hodi konsumu.
“Nuudar organizasaun Sosiedade Sivil husu ba Governu liu liu diresaun Bee Moos iha Buakau halo ligasaun bee nee ba iha komunidade sira kada uma kain iha bee mak selu laiha problema,” Malik argumentu.
Nia sujere ba BTL atu kanaliza bee moos ba uma komunidade sira neebe iha Vila Nova seidauk asesu bee moos, tanba kompara BTL oferese bee ba komunidade sira ho baratu enkuantu sosa husi transporte bombeiru privadu folin karun.
Liga asuntu nee, Jornalista STL tenta konfirma Koordendor Bee Timor Leste Munisipiu Baukau, maibe hetan komentariu ruma.
Jornalista: Tomas Reis
Editora: Carme Ximenes
