DILI, STLTIMORLESTE.com – Eskola Sekundáriu Jeral (ESJ) nu. 4 Setembru Balide fahe farda oin tolu (2) ba estudantes sira, atu nunee kada loron sira uza ona uniforme refere.
Lia hirak nee hatoo husi Diretor ESJ nu. 4 Setembru Balide, Sergio A. da Cruz ba jornalista STL, Segunda (08/09/2025).
Nia hatete, lo-loos uniforme nee entrega ona ohin, maibe adia fali ba aban, tanba sira nasional ho munisipiu ohin la mai. Estudantes sira mos mai la lori sira nian resibu.
“Hau fo ona mensajen ba iha Munisipiu, maibe ohin sira la mai.Tuir los ohin, maibe tanba direjente husi nasional no Munisipiu la mai, entaun ami haruka estudantes sira tama fali iha sala, hodi partisipa iha aprendizajen,”dehan nia.
Sergio hatutan, fahe farda nee adia fali ba aban, no ohin husu ona ba estudantes sira hotu atu aban hotu-hotu lori ho resibu. Sira nia farad iha farda oin tolu maka hanesan Segunda ho Tersa nian saia, kalsa, faru mutin, Kuarta no Kinta kalsa naruk faru mutin, Sesta no Sabadu training. Farda oin tolu nee hamutuk ho sintu pakote ida nee US$ 50.
“Sintu nee iha ninia matan iha logo Ministeriu Edukasaun ho naran eskola nian,farda sira nee hotu-hotu ho sira nian naran,” nia tenik.
Nia hatutan, total estudantes agora dadaun nee hamutuk 2,200 resin, professores neebe hanorin hamutuk 77, sala de aula 24, turnu rua, 24 dader no 24 loraik.
Jornalista: Jacinta Sequeira
Editora: Domingas Gomes
