DILI, STLTIMORLESTE.com – Advogadu Privadu, Fernando da Costa preokupa ho ema balu la liu husi Sentru Formasaun Juridiku no Judisiariu (SFJJ), maibe halao knaar hanesan Advogadu Privadu.
“Iha Advogadu ida presiza iha Ordem dos Advogadu atu regulariza Advogadu sira hotu, Governu loke tiha formasaun ba Advogadu sira maibe la iha ordem ida atu regulariza Advogadu sira nia papel nee oinsa, ida nee importante, tanba lae balu laos Advogadu mos hanaran aan Advogadu,” dehan Fernando ba jornalista STL iha Kaikoli, Dili, Tersa (09/09/2025).
Fernando mos kestiona ema balu la lisensiatura direitu ba halao pratika iha Asosiasaun balu mai sai ona Advogadu, serake ida nee bele, tanba ema balu tuir ona formasaun iha Advogadu nian, maibe iha prosedimentu prosesual nian iha konfuzaun oituan, oinsa ho ida neebe la tuir prosedimentu neebe iha bele hamonu dignidade no matoridade Advogadu nian.
Tanba nia tenke iha Ordem do Advogadu atu regulariza, no la iha ema ida maka lisensiatura no sai ona Advogadu, ema ida atu halao nia knAar no advokasia tenke liu husi formasaun ida, tenke iha konhesimentu kona-ba prosesual.
“Realidade iha barak los ona la liu husi Sentru Formasaun, maibe haknaar aan hanesan Advogadu, kaer prosesu lakon hela deit no ida nee se maka sala Advogadu maka sala,” nia kestiona.
Advogadu privadu nee husu Governu tau atensaun no preokupasaun Advogadu sira nian neebe aprezenta ona liu husi Ordem dos Advogadu, tanba se la iha ordem dos Advogadu hanesan la iha matadalan ida ba Advogadu atu halao sira nia papel.
Iha fatin ketak, koordenador Esbosu Lei Ordem Advogadu, Sergio Lobo Junior dehan, ema balu maka halo ida nee, tanba nee maka presiza iha ona Ordem dos Advogadu hodi regulariza.
“Ema barak mak halo ida nee no Tribunal hatene hela maibe lakohi halo impedimentu ba ida nee, esforsu an hela atu esbosu lei nee lalais hetan aprovasaun, atu iha regulamentu ida atu kontrola buat sira nee hotu, “dehan nia.
Tanba tuir nia iha lei numeru 11 terseru alterasaun hateten katak, sira neebe la pratika no la tuir formasaun sira neebe maka Governu fo sai no tenke tuir SFJJ, sira nia knar nee to deit iha tinan 2016, atu kontinua sira nia ezersisu sira tenke iha formasaun no relatoriu ruma, durante sira nia pratika iha Tribunal, maibe hahu husi 2009 to iha 2016.
Aleinde nee, Koordenadora Grupu Trabalhu Reforma Setor Justisa, Lucia Lobato dehan, sira nia parte mos halo ona diskusaun kona-ba lei AP nian.
“Hau nia gabinete ami mos fo apoiu kon-aba esbosu ida uluk nee, ami mos halo diskusaun lubuk ida haruka ba iha Ministru Justisa, too agora la iha ema ida hatan, mas hau prepara ona se ema ida la hatan hau haruka diretamente ba Primeru Ministru, depois Primeiru Ministru deside atu halo saida ho projetu neebe hau hato ba,” dehan nia.
Jornalista: Terezinha De Deus
Editora: Carme Ximenes
