DILI, STLTIMORLESTE.com – Konstituisaun fo dalan atu harii Tribunal Supremu Justisa (TSJ), maibe rekursu umanu neebe sei ba prienxe iha fatin nee hodi halao knaar tenke mai husi karreira elevada.
Dehan Jurista Sergio Dias Quintas ba jornalista STL iha Kaikoli, Dili, Tersa (09/09/2025).
“Liu liu ba Juiz neebe mak tur iha TSJ tenki Juizes de karreira signifika katak, karreira elevada,” dehan Jurista Sergio.
Harii Tribunal Supremu Justisa (TSJ) tuir Sergio bazeia ba normal konstitusional iha artigu 124, nomos lei numeru 25/2021, iha nia artigu 27, no iha ona lei para implementa klaru ke nia lalaok sei hamosu desafiu, mas laos sai barreira para labele aplika lei nee.
Maibe atu hari STJ nee iha ona lezislasaun tuir lei organizasaun judisiaria, relevante tebes atu hari TSJ iha momentu agora, atu fo Justisa ho kualidade ba ita nia sidadaun.
Jurista nee sublina kona-ba rekursu umanu laiha kestaun tanba atu tur iha Tribunal Supremu Justisa (TSJ) la presiza numeru Juiz konselheiru neebe boot, maibe atu sai Juiz iha TSJ bele mai husi Juiz karreira nian, Majistradu Ministeriu Publiku nian, Jurista nee bazeia ba normal konstitusional tuir artigu 25 no lei organizasaun judisiaria iha artigu 30.
Iha fatin ketak, Jurista Fernando da Costa dehan, presiza duni hari Tribunal Supremu Justisa (TSJ), tanba se la iha maka Tribunal Rekursu ( TR) sai hanesan desizaun ultima.
“Presiza duni harii tanba, realidade prosesu hotu Tribunal Rekursu maka deside no nia kontinuasaun ba fali iha TSJ la iha ona, tanba nee hari ona TSJ atu prosesu ruma presija rekore ba iha TSJ bele rekore,” dehan nia.
Aleinde nee, Prezidente Asosiasaun Majislatura Judisial Timor Leste (AMJTL), Antoninho Gonsalves afirma Juiz sira neebe sei ba tur iha Tribunal Supremu Justisa (TSJ) laos foti deit, maibe liu husi konkursu.
“Tenke liu husi konkursu oras nee dadaun Juiz Segunda klasse iha nain neen, sira seluk nee terseira klasse, tanba nee sei loke konkursu atu sira terseira klasse sae ba segunda klasse, no sira segunda klasse ba fali iha Primera klasse,” dehan Antoninho.
Enkuantu, Prezidente Tribunal Rekursu, Afonso Carmona dehan, planu harii Supremu Tribunal Justisa iha tinan oin, no agora tama hela iha faze atu haree kona0ba prosesu Juiz sira atu ba tur iha TR no TSJ.
“Orsamentu tama nee atu hadia Tribunal tuan, hodi instala ba Supremu nian nee,” dehan nia.
Jornalista: Terezinha De Deus
Editora: Carme Ximenes
