DILI, STLTIMORLESTE.com – Formadus neebe tuir formasaun iha Sentru Formasaun Juridiku no Judisiariu (SFJJ) bainhira la liu ba iha faze estajiu, bele halo rekursu ba iha hirarkia neebe iha, tanba lei fo dalan.
Tuir Jurista Sergio Dias Quintas katak, formandos advogadus nain 7 desizaun husi sentru formasaun la liu ba iha faze estajiu, maibe sira halo rekursu ba Visi Ministru Justisa no ikus mai Visi Ministru Justisa haruka Sentru Formasaun Juridiku no Judisiariu (SFJJ) fo oportunidade atu kontinua ba faze estajiu, nee tanba lei maka haruka.
“Se ema ruma la aseita SFJJ nia desizaun nia bele halo rekursu administrativa ba SFJJ nia hirarkia,” dehan Sergio ba Jornalista STL iha Kaikoli, Dili, Tersa (09/09/2025).
Jurista nee sublina, haree husi aspetu prosedimentu administrative, bainhira parte ruma la aseita desizaun administrativa ruma nia bele halo rekursu hirarkia.
Tanba SFJJ too ohin loron hirarkikamente iha Ministeriu Justisa nia okos, tanba tuir estatutu MJ nian, kona-ba atu hamrik mesak ka lae nee ladun importante, maibe kestaun mak lalika interven direita ba rekrutamentu ba formandu sira, para manten nafatin nia kualidade.
Iha fatin ketak, Jurista Fernando da Costa dehan, distribuisaun papel entre Ministru no Visi Ministru nia parte la iha konhesimentu too iha neeba, maibe la liu iha SFJJ ba kareira, Juiz, Prokurador, Defensor no Advogadu, bele halo rekursu administrativu.
“Bele halo rekursu administrativa hirarkia ida nee Ministru nia desizaun laos Visi, bainhira Ministru nia despaisu tun mai iha Visi Ministru maka foin foti desizaun, maibe nafatin kordenasaun desizaun husi Ministru, laos Vise Ministru,” dehan nia.
Aleinde nee, Koordenadora Grupu Trabalhu Reforma Setor Justisa, Lucia Lobato hakfodak ho desizaun neebe Visi fo sai.
“Hau hakfodak ho desizaun neebe Visi Ministru halo, hau la hatene se Visi Ministru iha kompetensia atu deside rekursu sira nee hau duvida katak, iha kompetensia atu deside kona-ba ita nia formadus sira husi Sentru hatoo,” dehan Lucia.
Jornalista: Terezinha De Deus
Editora: Carme Ximenes
