DILI, STLTIMORLESTE.com – Primeiru Ministru (PM) Malazia nia vizita mai Timor Leste (TL) iha fulan nee importante tebes ba TL nia adezaun full membru ASEAN iha fulan Outrubru.
Lia hirak nee hatoo husi Visi Primeiru Ministru Francisco Kalbuadi Lay ba jornalista sira, bainhira remata halo enkontru ho Prezidente Republika Jose Ramos Horta, iha Palasiu Prezidensial Nikolau Lobato, Bairo Pite, Tersa (09/09/2025).
Visi Primeiru Ministru Kalbuadi hatete, ho vizita PM Malazia, Dato Sria Anuar Ibrahim neebe sei vizita TL iha loron 23 Setembru importante tebes ba TL nia adezaun ba ASEAN iha fulan Outubru tinan nee.
Visi PM hatete, ho vizita PM Malazia nia mai TL nee mak ohin Visi PM mai kordena ho Prezidente Republika ho ekipa Prezidensial Republika oinsa halo preparasaun hodi simu PM Malazia.
“Mai koordena ho Prezidente sobre vizita ida neebe mak atu mai sua exelensia Primeiru Ministru Malazia, Dato Sri Anwar, iha dia 23 fulan ida nee, neebe hau simu orden husi sua exelensia maun Boot Kay Rala Xanana Gusmão para atu koordena hela vizita ida nee,” dehan Visi PM.
Visi PM hatete, nia koordena ona ho Prezidente Republika nomos Ministeriu Negosiu Estranjeiru no Kooperasaun (MNEK) nomos parte seguransa oinsa halo preparasaun diak hodi simu PM Malazia.
“Entaun hau hahu koordena ho Prezidente ho mos ekipa seluk inkluzivamente MNEK nomos seguransa no Gabinete Primeiru Ministru nia, neebe hetan tiha ona orientasaun lubuk ida, hau komesa hahu aban ba oin atu koordena iha servisu ida nee, mezmu nunee ho ita boot sira nia apoiu iha kobertura sira neebe mak diak, vizita ida nee ita husu boot bele sai ho diak,” Katak Visi PM.
Jornalista: Emerenciana Pinto
Editor: Xisto Mendonça
