DILI, STLTIMORLESTE.com – Prezidensia Republika (PR) promove forum kona-ba empoderamentu ekonomiku feto ho parseru xave sira.
Prezidensia Republika liu husi Unidade Empoderamentu Ekonomiku Feto (UEEF), iha parseria ho Sentru ba Impaktu Sosial, Universidade New South Wales (UNSW), organiza Forum nivel aas ho tema “Economic Empowerment and Civic Wealth Creation.
Tuir komunikadu neebe STL asesu husi media Prezidensia Republika Sesta (12/09/2025) hatete, Forum nee halibur reprezentante sira hanesan Adjunta Xefe Kaza Sivíl Prezidensia Republika, Henriquieta Maria da Silva, Reprezentante husi Sekretaria Estadu ba Igualdade (SEI), ONG sira hanesan Fundasaun Alola no Care International, parseiru sira husi setor privadu, no benefisiariu sira husi programa kapasitasaun ekonomika.
Forum estratejiku neebe iha hanesan objetivu atu alina esforsu sira no define estratejia unifikada ida, neebe garante katak fortalesimentu ekonomiku husi feto Timoroan sira-nia, sei traduz diretamente iha prosperidade koletiva ba nasaun.
Durante debate, partisipante sira fahe esperiensia no analiza prinsipal desafio sira neebe feto empreendedora sira hasoru, hanesan asesu limitadu ba kreditu no merkadu.
UEEF aprezenta ninia abordajen pratika, neebe inklui formasaun emprezarial personalizada no programa literasia finanseira, hanesan baze ba diskusaun ida neebe luan liutan kona-ba susesu sira neebe hetan ona.
Destaka ona importansia atu ultrapassa inisiativa izoladu sira no harii sistema apoiu integradu ida, neebe liga programa fovernamental nian ho serbisu vital sira husi organizasaun sosiedade sivíl iha terrenu, kria rede ida neebe mak efikas no efetivu liutan ba feto sira.
Forum nee konklui ho kompromisu unifikadu ida atu promove empoderamentu lo-loos, laos deit fornese ajuda, maibe empoderamentu feto ida lo-loos, oferese ba feto ferramenta sira, koñesimentu no koneksaun sira neebe presiza atu sai motor independente ba kreximentu ekonomiku iha sira-nia komunidade.
Wainhira promove inisiativa ida nee, Prezidensia Republika reafirma ninia lidera no esforsu atu garante katak susesu husi kada feto empreendedora ida sai hanesan pilar ida ba konstrusaun reziliensia ekonomika família, komunidade, no nasaun TL nian.
Jornalista: Emerenciana Pinto
Editora: Domingas Gomes
