DILI, STLTIMORLESTE.com – Dosentes husi Dili Institute Of Technology (DIT) hamutuk 21 kontinua sira nian estudu iha rai liur.
Lia hirak nee hatoo husi Reitor DIT, Salustiano dos Reis Piedade ba STL, Sesta (12/09/2025).
“Agora daudaun dosentes DIT neebe mak estudu iha rai liur hamutuk 17. Husi 17 nee, nain 3 estuda iha Portugal, nain 4 estuda iha Brazil, nain 10 estuda iha Indonezia. Sira kontinua estudu iha area petroliferu, egosiasaun nomos ba lingua portugues no englesh,” nia esplika.
Nia dehan, MESSK nian preokupasaun ida mak atu dezenvolve diak liu tan lingua português nee, entaun haruka dosentes sira nee balun ba estudu iha lingua português ninia, maibe sira neebe ba Indonezia nee iha area English, maibe barak liu mak ba iha lingua português.
“Hau hanoin husi ami nian dosentes 17 nee, iha nain 6 mak hetan bolsu estudu husi FDCH, nain 11 nee ami mak haruka. Nain 6 mak hasai mestradu no nain 11 ba hasai doutoramentu. Normalmente nee ba mestradu nee tinan 2, doutamentu nee masimu tinan 5,” dehan nia.
Nia hatutan, sira nain 17 nee haruka dezde iha tinan 3 tui-tuir malu, maibe tinan nee haruka tan dosente husi enginaria nain 4, jestaun no negósiu nain 1 ba foti programa dotoramentu, nain 4 ba Indonezia no nain 1 ba Malazia.
Jornalista: Jacinta Sequeira
Editora: Domingas Gomes
