DILI, STLTIMORLESTE.com – Portavoz Sekretáriadu Rekrutamentu Membru Polísia foun, Superintendente Polísia António da Luz hateten, komisaun rekrutamentu rejista total kandidatu neebe submete ona sira nia dokumentu hodi konkore vaga rekrutamentu membru Polisia Nasional Timor Leste (PNTL) foun hamutuk 13.772.
“Too horiseik munisípiu sira submete ona dokumentus kandidatu nian mai iha sekretáriudu Nasionál. Kandidatu neebe submete ona dokumentus nee hamutuk 13.772,” hatete Portavoz Sekretáriadu Rekrutamentu Membru Polísia foun, Superintendente Polísia António da Luz ba jornalista sira iha Sentru Formasaun Polísia (SFP) Komoro Dili, Sesta (12/09/2025).
Nia esplika, husi 13.772 nee ekipa Sekretaria sei halo selesaun fila fali ba dokumentu sira, sei haree fila fali, se kandidatu sira nee mak dokumentus kompletu, signifika sira bele pasa, se balun la kompletu tuir rekezitu ne’ebé iha mak sei elimina.
Tanba nee mak Sekretáriadu sei haree hodi halo verifikasaun fila fali. Neebe verifikasaun nee bele han semana ida, tanba barak, entaun presiza tenke atensaun didiak hodi labele prejudika sira.
“Orsida Sekretáriadu hahu verifika ona, ita nian tempu nee iha semana ida para halo verifikasaun, kuandu verifikasaun hotu mak sei taka sai naran ba públiku, fo tempu ba kandidatu sira atu bele haree lista naran sira nee, se mak naran iha prepara ba ezame,” nia esplika.
Nia informa, data ezame ita fo sai katak, iha dia 5 Outubru 2025, espera katak prosesu hotu lao diak, dia 5 Outubru ita hahu ba ezame.
“Prova kulturál ita halo iha munisipiu idak-diak, so ezame fiziku mak halo iha sentru formasaun Polísia Komoro, Dili,” nia deklara.
Nia esplika, matéria ba prova kulturál nee PNTL servisu hamutuk ho Ministeriu Edukasaun mak elabora pergunta nee ho tipu prova kulturál ba rekrutamentu membru PNTL foun nee halo hanesan ezame nasionál ba estudante sira, kandidatu sira tenke lori lapis 2B, regua, apagador, afiadór no fila ba resposta modelu hanesan folha de responta ezame nasionál.
Tanba nee mak ohin loron Sekretáriadu Rekrutamentu membru polísia sira konvida reprezentante Ministeriu Edukasaun hodi fo simulasaun ba ekipa rekrutamentu kada munisípiu oinsá sira bele hatene lalaok kona-ba regra teste ezame kulturál ba kandidatu husi kada munisípiu sira,” nia koalia.
Nia informa, regra ba teste mak sala de aula, komisaun sei prepara sala rua ba kandidatu sira dala ida sei prienxe ema nain 20 no sala ida sei prienxe ema nain 20. Sei iha ema nain rua mak sai supervizaun ba kandidatu sira iha sala laran durante ezame nee lao.
Nia hatutan, ezame kulturál se halao iha 5 Outubru 2025, kandidatu sira ba tuir ezame tenke lori resivu neebe mak komisaun fo ona momentu sira submete dokumentu. Kuandu kandidatu sira la lori nee sei elimina husi prosesu, tanba nee kriteriu ida mos husi rekrutamentu neebe komisaun estabelese iha rekrutamentu, ida nee obrigatoriu.
Entretantu husu kandidatu sira neebe atu tuir ezame kulturál nee realiza prova kulturál loron 5 Outubru tinan 2025 neebe halao iha munisípiu hotu-hotu, tama iha sala izame no esklaresimentu 8:30, pereparasaun ba kandidatu 8:30 too 9:30 OTL no prova kulturál husi tuku 10: 00 too 12:00 OTL.
Jornalista: Jeniche da Costa
Editor: Xisto Mendonça
