DILI, STLTIMORLESTE.com – Governu liu husi reuniaun Konselhu Ministru aprova projetu Rezolusaun Governu nian, neebe aprezenta husi Ministru Defeza, Donaciano do Rosário Gomes, kona-ba kompromisu operasional konjuntu entre FALINTIL – Forsa Defeza Timor Leste (F-FDTL) no Polisia Nasional Timor Leste (PNTL) iha teritoriu laran.
Tuir nota komunikadu imprensa neebe STL asesu husi Governu iha Sesta nee (12/09/2025) sita katak, objetivu husi operasaun konjuntu nee mak atu mantein orden publika durante vizita sira mai Timor Leste husi figura oin-oin no membrus Governu husi nasaun amigu sira.
Iha ambitu husi eventu nasional sira ho importansia boot, hanesan Timor Leste nia adezaun ba ASEAN, serimonia ofisial ba komemorasaun tinan 50 Proklamasaun Independensia no festividade natal no tinan foun nian.
“Rezolusaun Governu nee estabelese operasaun patrulhamentu no vijilansia iha fatin sensivel iha munisipiu hotu-hotu, hodi prevene aktu disturbiu sosial. Forsa Tarefa nee sei koordena husi Xefe Estadu-Maior-Jeneral Forsas Armadas no Komandante Jeral PNTL, ho apoiu husi entidade governamental no institusional oin-oin,” haktuir nota komunikadu nee.
Rezolusaun nee mos prevee medida espesífiku sira, hanesan define kadeia komando, regra empenhamentu no apoiu intelijensia nian, no mos uzu proporsional husi forsa tuir lei neebe vigora. Forsa-Tarefa sei halao nia operasaun hahu iha loron 14 Setembru 2025 too loron 6 Janeiru 2026.
Jornalista: Alberto Menezes
Editor: Xisto Mendonça
