BAUKAU, STLTIMORLESTE.com – Estudante estajiaria sira husi Instituto Superior Cristal (ISC) neebe hetan asidente ho kareta mikrolete marka Cheguevara iha area Abolir Matebian Hun, Suku Abo, Postu Administrativu Matebian, Munisipiu Baukau, laiha ligasaun ho atividade eskola nian.
Dosente ISC Polo Baukau, Leopoldo Moreira Belo esplika, estudante estajiaria neebe hetan asidente iha area Matebian Hun husi ISC Sentral Dili area estudu parteira nian neebe daudaun halao estajiu iha HoREX Baukau ba area estajia Klinika Bazika no estajia ba area espesialidade nian, maibe too hetan asidente iha area matebian hun.
“Lo-loos nee labele akontese ida nee, tanba kampus iha regra neebe bandu estudante atu halo atividade seluk, derepente kalan ami rona estudante hirak nee dehan mikrolete ida naran Cheguevara tula sira ba neeba hetan dezastre,” hateten Leopoldo ba jornalista sira iha resintu sala emerjensia HoREX Baukau, Sesta (12/09/2025).
Nia sublina, estudante estajiaria hirak neebe enfrenta asidente refere iha matebian hun laos ba halao atividades eskola nian, maibe inisiativa husi estudante refere hakarak halo peregrinasaun ba foho matebian no too iha dalan klaran area foho matebian nian hetan asidente ho kareta mikrolete neebe sira utiliza husi Baukau Vila ba area refere.
Nia fundamenta, viajen neebe estudante estajiaria sira halo laiha orientasaun husi eskola no tuir informasaun neebe parte seguransa husi eskola iha estudante hirak nee kontra regras instituisaun, tanba soe pasta husi moru laran ba moru liur hafoin halao viajen too hetan asidente refere.
“Sira atu ba halo peregrinasaun ba foho matebian, too hetan dezastre mak ami foin rona, ami nunka hetan informasaun ate seguransa mos la hatene, tuir informasaun husi seguransa katak sira neebe ba halo peregrinasaun balun dehan soe pasta husi moru sorin ba foti iha moru sorin,” Leopoldo haktuir.
Estudante estajiaria ISC neebe hetan asidente iha area matebian hun hamutuk nain 13 mak hanesan Anastacia husi Munisipiu Ermera, Ajaulina husi Vikeke, Nitze husi Likisa, Henderika husi Lautem, Loizinha husi Likisa, Silviana husi Bobonaro Atabae, Lurdes husi Vikeke, Nelcia husi Likisa, Nilvania husi Same, Sezia husi Manatuto, Febrinha husi Same, Idonia husi Lautem, no Ivonia husi Munisipiu Vikeke.
Tuir informasaun neebe iha asidente refere estudante estajiaria nain 6 hetan kanek grave, maibe dosente nee la fo komentariu, tanba razaun hafoin estudante sira too iha sala emerjensia HoREX Baukau, parte mediku sira taka odamatan ba mestri sira atu vizita.
“Hau hanoin nee dezastre boot ida ba ami instituisaun Superior Cristal, tanba sira nee remata ona estajiu iha dia 11 Setembru atu fila ona no ami triste liu bainhira sira sai ami la hatene buat ida, maibe derepente ami rona katak sira hetan dezastre,” Leopoldo argumentu.
Estudante estajiaria ISC neebe hetan asidente iha Matebian hun, liu husi esforsu ho Sentru Saude Kelikai transporta kedas mai HoREX Baukau, hodi hetan tratamentu husi mediku sira.
Too notisia nee publika, STL seidauk hetan komentariu husi parte mediku sira iha sala emerjensia HoREX Baukau kona-ba estajiaria nain 13 nia kondisaun, tanba parte mediku sira sei inkomoda halo atendimentu.
Entretantu asidente refere akontese iha loron 12 Setembru 2025 parte loraik.
Jornalista: Tomas Reis
Editora: Domingas Gomes
