BAUKAU, STLTIMORLESTE.com – Autoridade Suku Loilubu, Postu Administrativu Vemasi, nota projetu reabilitasaun estrada husi Suku Loilubu ba Fatukama Suku Gariuai, Postu Baukau Vila no husi Loilubu ba Postu Venilale, Munisipiu Baukau progresu diak, maibe parte kompanhia menus ekipamentus servisu.
Xefe Suku Loilubu, Joanico da Costa Freitas esplika, projetu refere hafoin lansa fatuk dahuluk iha fulan Fevereiru tinan nee too ohin loron hatudu progresu diak, tanba parte kompanhia liu husi trabalhador sira aselera servisu.
“Agora servisu sira hanesan pengerasan agora komesa ona book saluran, sira book hotu saluran sira foin tama ba ateru beskos no seterusnya, maibe agora nee sira halo hela penahanan ho saluran,” hateten Joanico ba STL liu husi telefone, Segunda (15/09/2025).
Nia sublina, servisu neebe daudaun parte kompanhia liu husi trabalhador sira halao iha terenu mak hanesan hada’a barajen no konstrui valeta hafoin kontinua ba faze tuir mai ikus nahe’e alkatraun.
Nia fundamenta, servisu hirak nee kuaze iha fatin 2 husi Loilubu ba Fatumaka no husi Loilubu ba Postu Venilale lao hanesan, maibe sei la finaliza projetu tuir data kontratu, tanba parte kompanhia menus ekipamentus servisu.
“Tuir buat neebe hau nota kompanhia nia fasilidade balun ladun funsiona ida nee mak prejudika trabalhador sira nia servisu, trabalhador hakarak servisu lais so que sira nia makina pezadu nee mak difikulta, mais progresu servisu sempre mudansa nafatin,” Joanico argumentu
Autoridade Suku Loilubu nee deklara, projetu refere parte kompanhia lokal 4 mak responsabiliza, maibe falta ekipamentus servisu, tanba ekipamentus servisu hanesan mikser iha deit unidade 2, nunee difikulta servisu, maibe progresu fiziku kontinua lao.
Nunee parte Suku husu Ministeriu Obras Publikas Destakadu Munisipiu Baukau atu kontinua halo monitorizasaun ba projetu refere hodi finaliza tuir data kontratu neebe Governu no kompanhia selebra ona.
“Ita mos husu Obras Publikas halo monitoring beibeik para ita haree kualidade projetu nia benefisiu ba komunidade, tanba gastus de orsamentu estadu tenke gasta ho kualidade,” Joanico sujere
Liga asuntu nee STL tenta komfirma Koordendor Tekniku Obras Publikas Destakadu Munisipiu Baukau maibe laiha fatin atu fo komentariu.
Entertantu projetu reabilita estrada dirasaun Fatumaka-Loilubu-Venilale liu kilometru (km) 18 responsabiliza husi kompanhia Golden Way ezekuta pakote dahuluk distansia km 6.040 ho valor orsamentu US$ 4,050,246.70, pakote daruak km 6.025 ezekuta husi kompanhia Glory Enterprise ho valor US$ 4,131,791.10 no pakote datoluk km 6.025 ezekuta husi kompanhia Jolitoni Unipessoal Lda US$ 3,850,083.25 neebe tuir kontratu kompanhia 3 refere durasaun servisu fulan 12.
Jornalista: Tomas Reis
Editor: Xisto Mendonca
