DILI, STLTIMORLESTE.com – Ministeriu Publiku (MP) iha alegasaun ba krimi Falsifikasaun Agravada previstu iha artigu 304, krimi Burla Agravada previstu iha artigu 267, krimi Abusu Konfiansa Agravadu previstu iha artigu 257, solisita ba iha Tribunal koletivu atu kondena arguidu SMC no CG ba iha pedidu indemnizasaun.
Iha alegasaun nee Prokurador Renato Bere Nahac deklara katak, iha audensia julgamentu arguida konfesa ba faktus katak, arguida konhese lezadu sira no sira iha planu atu hari ospital.
Prokurador deklara, liu husi planu neebe iha maka ikus mai sira loke konta bankaria ida, no sira halo akordu kuandu halo levantamentu ba osan.
No osan neebe arguida foti uluk US$ 90,000,00, no hetan autorizasaun husi lezadu sira, maibe iha osan segundu neebe arguida ba foti US$ 250.000,00 arguida halo mudansa tiha ba dokumentu neebe iha katak, ema nain ida bele asina hodi foti osan nee, tanba nee arguida maka foti osan.
Prokurador deklara, tuir regra iha prokurasaun nee atu foti osan tenke ema nain tolu asina, ka hetan autorizasaun husi lezadu sira maka foin bele foti, maibe arguida halo mudansa ba iha prokurasaun katak, ema nain ida maka halo levantamentu mos bele.
Maibe osan neebe halo levantamentu halo fali arendamentu ba rai, no banhira konfirma ba iha sasin sira, sasin sira deklara katak mudansa ba iha dokumentus nee antes ona, no tuir regra kuandu halo ona akordu ida la iha mudansa ba dokumentu. No antes nee, parte lezadu sira mos deklara, seidauk halo kontratu ho arguidu sira konaba rai.
Prokurador deklara katak, iha ona akordu konaba foti osan, tanba nee labele halo mudansa ba iha prokurasaun. No konsidera osan neebe arguidu sira foti lori ba arenda rai.
Tanba nee MP mantein ho akuzasaun neebe iha, no husu Tribunal atu aplika pena minimu ba arguidu nain rua, no selu mos indimizasaun neebe iha no osan nee kleur ona atu selu mos ho nia jurus tuir dalan legal neebe iha.
No MP konklui hodi husu Tribunal atu kondena arguido sira selu indeminizasaun ba lezadu sira ho valor $ 300.000,00 (dolar rihun-atus-tolu).
Enkuantu defeza arguidu sira nian, Cansio Freitas deklara katak, akordu neebe iha konaba akordu investimentu, tanba nee maka arguida mos ba foti osan.
No defeza konsidera, arguida ba foti osan mesak tanba sira iha akordu, tanba nee defeza konsidera la prense ba krime neebe iha, no husu Tribunal atu absolve arguida no arguidu.
Rona tiha alegasaun, Tribunal adia ba loron seluk hodi rona desizaun.
Tuir akuzasaun neebe iha katak arguida SMC imprejaria, no arguidu CG imprejariu.
Iha loron 6 fulan Junhu tinan 2018, lezada ML hamotuk ho arguida ba loke konta bankaria kompanhia ida nian.
Bainhira loke hotu konta bankaria, lezada sira halo prokurasaun ho arguida konaba levantamentu osan, neebe prokurasaun nia laran hateten katak, atu halo lezavantamentu osan iha banku tenki ema nain tolu asina ka hetan autorizasaun husi lezadu sira maka bele.
Iha loron 3 fulan Julhu tinan 2018, lezado THL haruka osan ho montante US$190,000,00 husi Xina mai iha konta bankaria kompanhia nia no bainhira atu halo levantamentu hetan autorizasaun husi lezada ba arguida.
Arguida ba halo levantamentu osan US$ 90,000,00 iha Banku Mandiri, tamba hetan prokurasaun husi lezadu sira.
Iha loron 11 fulan Julhu tinan 2018 lezado sira haruka tan osan ho montante US$ 250.000,00 ba iha konta bankaria kompanhia nian.
Iha loron hanesan arguida SMC ba halo falsifikasaun ba prokurasaun neebe iha hodi aumenta tan husi ema nain tolu asina ba fali entre ema nain ida asina mos bele halo levantamentu.
Husi falsifikasaun dokumentu neebe iha arguida SMC halo levantamentu osan US$ 250.000,00 husi konta bankaria kompanhia hudi transfere fali ba iha arguido CG nia konta bankaria kompania, laiha autorizasaun ka prokurasaun husi lezadu sira.
Arguida mos halo falsifikasaun dokumentu konaba aplikasaun konta bankaria husi lezada ML tau fali arguida nia naran laiha konesementu husi lezado sira.
Arguido CG simu osan husi arguida SMC hodi uza osan nee ba nia aktividade negosiu laiha autorizasaun husi lezadu sira hanesan osan nain.
Konsekuensia husi arguidu sira nia hahalok nee, lezadu sira lakon osan ho montante US$ 250,000,00.
Arguida SMC hatene katak, bainhira ba halo falsifikasaun dokumentus hodi halo levantamentu osan iha banku laiha prokurasaun ka autorizasaun husi lezadu sira nee krime, maibe arguida halo nafatin.
Arguidu CG hatene katak, bainhira simu osan ema seluk nia hodi uza osan hanesan ninian laiha autorizasaun nee krime, maibe uza nafatin hodi halo nia aktividade negosiu.
Arguida SMC hanesan autor material ba krime falsifikasaun agravada previstu iha artigu 304 no krime Burla Agravada previstu iha artigu 267 hotu hotu husi kodigu penal.
Arguidu CG hanesan autor material ba krime abusu konfiansa agravadu previstu iha artigu 257 husi kodigu penal.
Lezadu sira lakon osan ho montante US$ 250.000,00 husi arguido sira nia hahalok nomos difikulta sira atu halo atividade negosiu, tamba nee sira merese hetan fali prejuizu neebe iha.
Lezado sira sinti trauma hosi asaun neebe arguido sira halo, tamba nee nudar imprejariu sira merese atu hetan fali prejuizu ho valor osan US$ 50.000,00.
Haree ba faktus sira iha leten Ministeriu Publiku tuir artigu 72,349 KPC, artigu 417,430 Kodigu sivil husu ba iha Tribunal atu kondena arguido sira selu indeminizasaun ba lezadu sira ho valor US$ 300.000,00 (dolar rihun-atus-tolu).
Audensia julgamentu nee, prezide husi Juiz Kolektivu, Ersilia de Jesus, Jose Maria, Ana Paula, Ministeriu Publiku reprezenta husi Prokurador Renatl Bere Nahac, arguidu hetan asistensia legal husi Advogadu Privadu Cansio Freitas.
Jornalista: Terezinha De Deus
Editora: Carme Ximenes
