BAUKAU, STLTIMORLESTE.com – Komando Polisia Munisipiu Baukau liu husi servisu sekreta buka tuir ona autor ba rama ambon neebe hana joven nain 5 iha area Star Motor, Suku Tirilolo, Postu Administrativu Baukau Vila, Munisipiu Baukau.
Komadante Komando Polisia Munisipiu Baukau, Superintendente João Sancho Pires informa, relasiona jovem nain 5 neebe hetan hana husi ema deskonhesidu nain 2 utiliza motor Vixion la ho sapa matrikula iha area Star Motor foin lalais nee, jovem nain 5 refere hatoo ona keixa iha Polisia Eskuadra Postu Baukau Vila no evidensia hanesan rama ambon asegura ona.
“Ita sei tenta buka autor nee laos Polisia mesak ema hotu-hotu apoiu hela Polisia para ita buka tuir autor nee, neebe rama ambon rua nee agora iha Investigasaun nia liman,” hateten João Sancho Pires iha knaar fatin Vila Nova, Baukau, Sesta (26/09/2025).
Husi asaun nee nia dehan, ema deskonhesidu nain 2 tenta hana jovem nain 5 iha Star Motor mezmu la rezulta hetan kanek, tanba rama ambon refere la kona jovem sira, maibe parte Polisia sei esforsu buka tuir autor sira submete ba prosesu investigasaun, tanba asaun refere tenta atu estraga ema nia vida.
Prosesu buka tuir autor ba asaun refere Komando Polisia Munisipiu Baukau servisu hamutuk ho entidades hotu liu liu parte Polisia Eskuadra Postu Baukau Vila no ekipa tranzitu atu kontinua halo autor stop no swipng.
“Ita orienta ona ekipa transzitu mos halao swipng ita mos orienta ona Eskuadra para sira neebe tuur iha dalan 10 ou 11 kalan haruka fila ba uma deskansa, tanba nee oras deskansa nian mais sira tuur nafatin iha estrada tanba nee ita orienta preve buat balun,” João Sancho Pires argumentu.
Tuir Komadante Munisipiu nee katak, asaun ema deskonhesidu nain 2 hana jovem nain 5 iha Star Motor ho rama ambon iha oras tuku 11:00 parte kalan neebe konsidera oras deskansa nian, tanba nee Komando kontinua orienta ona ekipa atu patrolhu no bandu jovem sira tuur iha estrada ninin iha tuku 10:00 kalan ba oin.
Maibe atu evita liu tan jovem sira tuur iha estrada ninin iha tempu kalan, Komando Polisia Munisipiu Baukau mos husu lideransa komunitariu sira fo avizu mos ba jovem sira aliende mos husu atu apoiu servisu Polisia buka tuir autor ba rama ambon iha Baukau.*
Jornalista: Tomas Reis
Editora: Carme Ximenes
