DILI, STLTIMORLESTE.com – Bankada Partidu Libertasaun Popular (PLP) iha Parlamentu Nasional (PN) husu ba Polisia Sientifika Investigasaun Kriminal (PSIK), atu halao investigadaun ba autor sira neebe deskonfia fasilita hatama Scam Center iha Timor-Leste.
Xefe Bankada Partidu Libertasaun Popular (PLP), Deputada Maria Angelina Sarmento apresia kontribuisaun publiku husi membru Governu, Agio Parreira, neebe hateten katak governante balun bele envolve iha jogu Online.
Tanba tuir nia, ho baze ba evidensia nee, Deputada Maria Agelina husu Polisia Sientífiku, Investigasaun Kriminal, no orgaun judisiariu atu halo investigasaun seriu kona-ba jogu online no envolvimentu krime organizadu.
“Asuntu nee laos segredu ona, publiku hatene. Agora depende deit ba institusaun relevante atu halo investigasaun,” hatete Deputada Maria Angelina Sarmento ba jornalista sira iha resintu PN, Sesta (26/09/2025).
Deputada nee kritika mos Governu tanba blokia rezolusaun ida neebe opozisaun hatama antes, atu buka investigasaun kona-ba krime transnasional.
“Relatoriu ONU mos hatudu katak jogu online bele sai entrada ba ema kriminozu neebe akuzu ona iha kazu koorupsaun no lavazamentu osan. Perigu ida-nee tenke ita prevene ona,” nia dehan.
Deputada PLP refere katak jogu Online seidauk so problema sosial, maibe mos ligadu ho grupu kriminozu internasional. Nia relembra kazu Arnolfo Teves Jr, hanesan pontu ida neebe hatudu katak krime organizadu bele buras husi jogu online no subar iha Timor-Leste.
“Se ita loke jogu online ba sosiedade Timor-Leste neebe frajil, no mos liu-liu sosiedade neebe laiha empregu no rendimentu fixu, entaun ema barak sei hanoin jogu online nuudar oportunidade atu hetan osan lalais. Maibe ida-nee iluzau deit neebe bele kria dependensia no moras sosial iha komunidade,” hatete Deputada nee.
Jornalista: Alberto Menezes
Editora: Carme Ximenes
