DILI, STLTIMORLESTE.com – Prezidente Autoridade Munisispiu Dili (AMD), Francisco dos Santos hateten, selebrasaun Dili Day ba dala 256, bolu atensaun ba sidadaun sira hotu atu partisipa masimu iha selebrasaun nee, nunee hadia sidade Dili sai furak no saudavel liu tan.
Lia hirak nee hatoo husi Prezidente Autoridade Munisispiu Dili (AMD), Francisco dos Santos ba jornalista sira hafoin halo abertura ba selebrasaun Dili Day ba dala 256, iha Largo Lecidere, Segunda kalan (06/10/2025).
“Importansia husi selebrasaun Dili Day nee mak bolu atensaun ba sidadaun sira hotu atu partisipa masimu hodi hadia sidade Dili sai furak no saudavel liu tan, nunee ema hotu sente moris hakmatek no moris iha ambiente neebe mak saudavel nia laran,” dehan AMD Francisco.
Komemorasaun Dili Day ba dala 256 ho nia tema mak “Memorizar o passado, preparar o presente, projetar no futuro, atu dehan deit katak, pasadu neebe mak liu tiha ona sai hanesan referensia ida mai iha Munisipiu Dili hodi bele haree no prepara aan didiak hodi projeta iha futuru.
Enkuantu Autoridade Munisipiu Dili sei la servisu mesak, maibe servisu hamutuk ho saneamentu, jestaun merkadu no ekipa SEATOU nian atu organiza Dili sai sidade ida neebe mak sai moos.
“Hanesan autoridade Munisipiu Dili servisu hamutuk ho ekipa Munisipiu Dili nian, liu-liu hau nia forsa boot, servisu saneamentu, jestaun merkadu no servisu hamutuk ho ekipa SEATOU nian atu organiza Dili sai sidade ida neebe mak sai limpu, loro-loron sempre fo mensajen no organiza Dili sai sidade neebe mak moos,” tenik Francisco.
Nunee mos Autoridade Mnisipiu Dili sei la baruk no la kolen atu husu nafatin ba sidadaun hotu nia kolaborasaun, nunee bele hadia Dili tuir espetativa, Dili nee bele sai moos, furak no estavel ba ita hotu.
Enkuantu suku 31 iha Munisipiu Dili partisipa hotu iha Dili Day nee, nunee sira bele sente katak Dili day ida nee ba duni sira, laos ba grupu ida ka klase ida, maibe tinan ida nee selebra hamutuk ho komunidade sira hotu.
Entretantu atividade neebe mak halao iha selebrasaun Dili day ba dala 256 mak hanesan Karavana kultural hahu husi MNEK too Largo Lecidere, feira, kompetisaun no mos uza bero hodi bele harame eventu nee.
Jornalista: EST 1
Editor: Xisto Mendonça
