DILI, STLTIMORLESTE.com – Ministeriu Negosiu Estranjeiru no Kooperasaun (MNEK) hamutuk ho Ajensia Kooperasaun Internasaional Japaun (JICA) realiza workshop ho tema “Kompresaun Kona-ba Sentru AADMER no AHA, no Tratadu kona-ba Zona Livre husi Arma Nuklear Sudeste Aziatiku nian (SEANWFZ Treaty)”.
Vise Ministra Negosiu Estranjeiru no kooperasaun (MNEK), Milena Rangel dehan, objetivu husi workshop nee atu hasae ofisiais sira ninia konhesimentu, liu-liu ba iha Ministeriu no Ajensia neebe mak sai implementador ba akordu nee.
“Pratikamente ita hakarak aumenta tan ofisiais sira nia konhesimentu, liu-liu ofisiais neebe mak reprezenta husi Ajensia no Ministeriu neebe mak sai implementador ba akordu rua importante nee, akordu ida ba ASEAN nia, responde ba dezastre, ida fali kona-ba zona livre husi Arma Nuklear Sudeste Asiatiku,” dehan Milena ba jornalista sira iha City 8, Tersa (07/10/2025).
Nia dehan, responde ba rekezitus neebe estipuladu iha roteiru ida nee mak resposabilidade husi TL hanesan nasaun neebe mak atu adere ba ASEAN, finaliza hotu ona ninia kompromisu atu asegura ofisiais sira nia konhesimentu neebe mak natoon, tanba nee mak ohin realiza workshop ida nee.
Nia argumenta, akordu sira nee nia prosesu remata ona, nunee husi parte Governu too iha Parlamentu Nasional ratifika ona, hein atu ba asina final ba ita nia adezaun.
Iha fatin hanesan, Embaixador Japaun iha Timot Leste (TL), Tetsuya Kimura dehan, SEANWFZ, AADMER halao ona papel importante ida hodi proteje Sudeste Aziatiku husi ameasa armas nuklear sira no hodi hametin aliserse ba pas no estabilidade rejional.
“AADMER fornese estrutura pratika no kooperativa ida hodi reduz risku dezastre sira, proteje moris sira no hasae reziliensia, tantu SEANWFZ no AADMER fahe objetivu komun ida atu proteje seguransa no moris diak povu sira iha Sudeste Aziatiku,” katak Kimura.
Kimura dehan, Japaun uza ona ninia esperiensia rasik neebe luan ho dezastre natural sira hodi ajuda, hametin ASEAN nia kapasidade iha AADMER nia okos, hanesan JAIF, AHA, DELSA no ASEAN.
Jornalista: EST 1
Editor: Xisto Mendonça
