DILI, STLTIMORLESTE.com – Oras nee daudaun numeru Defensor Publiku hamutuk 30 resin, maibe konsidera seidauk sufisiente.
Defensor Publiku Jeral, Cansio Xavier dehan, sira integra tiha ona iha Defensor Publiku akompana husi professional sira neebe antigu, atu bele akompana sira tuir estajiu ho didiak.
“Ho nain haat neebe sei hanesan Defesor Publiku estajiadu aumenta tan ho sira tuan, maibe ita hare numeru rekursu umanus seidauk sufisiente ami presiza ema barak, lolos Defensor Publiku nia ajente sira neebe tuir estajiu hamutuk 15, maibe ikus mai ami hetan 4 deit,” dehan Cansio Xavier ba Jornalista sira iha Kaikoli, Tersa (07/10/2025).
Tuir nia, agradese tanba hetan nain 4 ona atu ajuda redus dezafiu neebe durante nee sira hasoru, no ba futuru kontinua presiza rekursu umanus, tanba estabelese edefisiu defensor iha munisipiu hotu, tenke koloka rekursu sira ba iha neeba.
Nia sublina, sira nain 4 neebe halao estajiu rua destaka iha Dili, ida iha Ermera no ida iha Maliana, sira integra tiha ona ba professional sira neebe antigu, atu bele akompana sira tuir estajiu ho didiak.
Cansio afirma, konaba tomada posse nee formalidade sira integra tiha ona ba estajiu, tanba iha enkontru jeral pedagojia nee, lolos nia efeitu.
Nunee tuir dadus neebe iha, oras nee dadaun numeru Defensor Publiku hamutuk 30, seidauk sura ho nain haat neebe estajiu, tanba sira seidauk integra ba iha Defensor Publiku sira sei hanesan estajiadu.
Iha fatin ketak Akademiku UNTL Sebastiao Dos Santos dehan, knar defensor nian importante atu tulun ema sira neebe buka justisa, tanba nee kontinua aumenta numeru ba Defensor sira.
“Hau hanoin knaar nee importante tebes, tanba nee presiza aumenta numeru rekursu umanus iha futuru,” dehan nia.
Nia hatutan, iha publiku balu la iha osan atu selu advogadu, tanba nee sira hili liu Defensor atu atende sira, maibe se numeru Defensor la sufisiente sai mos prekupasaun ida, tanba nee sujere atu aumenta numeru Defensor Publiku.
Jornalista: Terezinha De Deus
Editora: Domingas Gomes
