DILI, STLTIMORLESTE.com – Ekipa Konjuntu Polisia Nasional Timor Leste (PNTL) kompostu husi Unidade Polisia Maritima (UPM) ho Unidade Patrolamentu Fronteira (UPF) no Servisu Nasional Intelijensia (SNI), prende sidadaun estrajeiru Xina neebe halo tranzasaun ilegal hodi importa sigaru 398 kaixas ho roo boot iha area tasi ibun Lesse Oan, Aldeia Coloama, Suku Casabauk, Postu Administrativu Tilomar, Munisipiu Kovalima, iha loron 06 Outubru 2025.
Portavos Komando PNTL, Superintendente João Belo dos Reis dehan, evidensia sigaru ilegal hirak nee, sidadaun grupu ida halo aktividade transaksaun sigaru ilegal tula ho bero, husi tasi klaran mai atraka iha rai maran.
“Ita bazeia ba informasaun neebe sira kolleta, sira halo intervensaun detekta katak, ema estranjeiru deskonfia sidadaun Xina importa sasan ilegál mai ho ro boot. Depois transfer ba ro kiik sira hodi transporta mai tasi ibun, husi nee ita detekta sigaru hamutuk 398 kartun ka kaixas,” dehan Portavos Komando PNTL nee liu husi konferensia impresa iha Komando Jeral PNTL Kaikoli, Tersa (07/10/2025).
Nia afirma, nunee autoridade seguransa deskobre halo kedas atuasaun konsege asegura sasan hanesan, passaporte 2, sigaru karton 398, motor 5, kareta 1, mesin ketinting 3, sensor 1, osan US$ 1,103,5, bero 4 no Telemovel 5 iha area Lesse-Oan, Suku Cassabauc, Postu Administrativu Tilomar Munisipiu Kovalima.
Nia esplika, aktividade transaksaun sigaru ilegal nee, deskonfia envolve ema barak iha laran, hafoin Pesoal Polisia ida hetan, sira tenta ataka ho arma branka hodi ta pesoal polisia, tanba nee pesoal polisia foti desizaun tiru alargada, ema hirak halai fahe malu husik soe hela evidensia sira iha fatin, tanba sasán sigaru hirak nee nain ema sidadaun estranjeiru ida.
Dadaun nee ekipa konjunta asegura ona evidensia ro ketinting tolu, karreta prado ida ho motor ida hamutuk ho sigaru karton 300 ilegal iha Komandu PNTL Munisípiu Kovalima, hodi buka tuir nain ba sasan sidadaun estranjeiru nee hodi submete ba prosesu investigasaun.
Nia koalia, tuir informasaun balun ligasaun ba operasaun neebe Komando Munisipiu Kovalima horiseik lansa por volta tuku 02:00 Otl madrugada, sira hetan movimentu ro iha parte Casabauk nian, neebe mak deskonfia iha transaksaun ilegal.
Nia hatutan, autoridade seguransa prende no suspeitu sira halai hotu, agora prosesu investigasaun lao hela, nunee tenta bolu sira neebe mak nuudar motor nain, no kareta nain neebe para hela iha neeba hodi husu sira nia responsabilidade.
“Agora prosesu identifikasaun lao hela, orsida lokraik bele lori ba aprezenta iha Ministériu Públiku (MP), ho numeru nuk 0319/25 PNSIK, no ita seidauk hetan informasaun ruma katak, sira tenta ataka membru polisia, tanba wainhira ekipa konjuntu neebe lidera husi komadante munisipiu tun iha terenu sira hotu-hotu halai namkari, inklui sidadaun Xina nee rasik,”nia relata.
Nia hatutan, sigaru neebe sidadaun Xineza importa ilegál ho marka Marlboro hamutuk kartun 398, nunee kazu nee hanesan mos iha Munisipiu Manatuto semana kotuk halo intervensaun husi ro boot mak transfer ba Bero oan sira iha tasi klaran mak lori mai tasi ninin.
Purtantu dadaun nee PNTL asegura motor hamutuk 8,inklui kareta ida, depois bero sira neebe mak fasilita sasan husi tasi klaran mai too tasi ninin prende bero 4 no halo mos identifikasaun ba nain ohin loron 07 Outubru 2025.
“Ita halo tracking hela ba sidadaun Xina nia hela fatin, nia mai ho saida ita halo tracking hela espera iha tempu badak detein nia,” Portavos nee akresenta.
Iha biban nee, Komandu PNTL alerta nafatin ba membru Unidade Polísia Maritima no Unidade Polísia Fronteira kontinua kontrolu, tanba sigaru ilisitus neebe mak tama iha teritoriu Timor-Leste hamosu prezuizu boot ba estadu.
“Husi intervensaun ba sigaru Marlboro 398 nee deit estadu kuaze lakon US$ 750.000 taxa neebe mak tuir loloos sira selu ba estadu nee imajina boot la halimar, hanesan iha Tibar nee (satu juta resin), iha Manatuto mos US$ 500.000 resin, nee osan boot tuir loloos sira neebe mak importa sasan nee selu taxa karik, taxa boot la halimar ba estadu TL,” nia sublina.
Hahalok nee desvia husi kontrolu Alfandega nian hodi tenta atu tama ilegál depois lakohi selu taxa, nee Komando PNTL konsidera krime kontra bandu.
Jornalista: Jeniche da Costa
Editora: Domingas Gomes
