BAUKAU, STLTIMORLESTE.com – Autoridade Postu Administrativu Tutuala, Munisipiu Lautem informa, roo ahi ida kada loron peska besik iha ilha Jaco.
“Nee loos, laos mai iha Jaco maibe fatin iha Jaco kotuk neeba peskador Tutuala mos ba rasik neeba maibe roo ahi sira iha neeba hela duni, hau la hatene tasi nee pertense ita nian ga Indonezia nian, maibe sira peska iha neeba roo ahi mos iha neeba loron-loron,” hatete Administrador Postu Tutuala, Carlito Pereira liu husi telefone, Tersa (07/10/2025).
Autoridade nee hatuir, informasaun hirak nee informa husi peskador Tutuala oan sira katak, tasi neebe roo ahi ida kada loron halo peska ba la hatene tasi refere pertense ba nasaun ida neebe, maibe kada loron roo ahi refere mantein deit iha fatin hodi halo peska, tanba fatin neebe roo ahi refere para ba hodi halo peska ikan barak.
“Fatin neebe roo para ba nee dehan ikan nunka hotu, hau bele dehan sira ilegal tanba Tutuala oan mos ba kaer ikan iha fatin neeba,” katak Carlito.
Nia salienta, deskonfia roo ahi refere tama mai iha area tasi Timor nian, tanba fatin neebe daudaun roo ahi refere halo peskas ba antes nee peskador Tutuala oan sira mak halo peska, maibe ikus ikus nee roo ahi refere halo peskas iha tasi refere konsidera nee halo peska ilegal.
Haree ba asaun roo ahi refere peskador Tutuala oan sira tenta atu ba besik hodi haree, maibe tauk tanba deskonfia roo ahi refere posibilidade iha armas balu.
“Peskador sira dehan roo sei iha neeba nafatin, sira mos tauk besik, tanba sira ba ho roo kiik ema mai ho roo ahi, deskonfia mai ho arma ruma, nunee sira la besik,” Carlito argumentu
Tanba nee husu Polisia Martima halo patrolhamentu ho roo too area refere, nunee bele hatene peskas husi roo ahi refere halo peskas iha tasi pertense ba nasaun neebe loos.
Maibe tuir Autoridade Postu Tutuala nee katak, diak liu Governu Timor Leste investe makaas iha area maritima liu husi sosa roo ba Polisia no Militar maritima sira hodi halo patrolhamentu rutina iha area tasi Timor hodi evita peskas ilegal, tanba maioria roo neebe movimentu iha tasi Timor husi nasaun seluk, maibe utiliza bandeira RDTL hodi halo peska livre iha tasi Timor.
Nia komenta, bainhira Governu la haree asuntu patrolhu maritima nian ho diak mak Timor Leste sei kontinua lakon nia rikusoin iha tasi laran liu-liu ikan sira.
Jornalista: Tomas Reis
Editor: Xisto Mendonça
