DILI, STLTIMORLESTE.com – Asesor Prinsipal Prezidente Republika, Jeneral Reformadu Lere Anan Timur hatete, problema Timor Leste (TL) ho Republika Indonezia (RI) uluk nee tau ba kotuk, tanba funu nia hahalok, agora tuur hamutuk hakerek ba istoria.
Jeneral Reformadu Lere Anan Timur hatoo kestaun nee liu husi nia aprezentasaun, bainhira simu vizita husi Jeneral Veteranus Indonezia, Jeneral Lat, iha Farol, Tersa nee (07/10/2025).
Eis Komandante F-FDTL hatoo benvindu ba veteranus jeneral sira husi Indonezia neebe ohin hakat mai rezidensia hodi koalia hamutuk istoria neebe liu ona, agora hamutuk fo liman ba malu hodi hametin bilateral rai rua iha futuru.
“Ita maun alin, problema neebe uluk nee ita tau ba kotuk, agora ita tuur hamutuk hakerek ita nia istoria,” dehan Eis Komandante F-FDTL.
Lere dehan, Komandante Viky ho nia ekipa mai Timor Leste hodi konta istoria rai rua nia, no mos haree servisu sira neebe oras nee lao hela.
“Iha funu laran ami hanoin katak ami deit mak vitima, maibe kuandu funu hotu povu Indonezia no povu Timor Leste hotu-hotu sai vitima, tanba nee mak iha nesesidade hakerek istoria, hakerek istoria nunee aban bainrua ita nia oan sira labele repete tan,” katak nia.
Nia argumenta, bainhira veteranus sira husi Indonezia mai Timor Leste iha Konselhu Veteranus, veteranus parte rua sei koalia no hakoak malu no istoria rai rua marka diferense iha mundu.
“Ita marka istoria diferensia iha mundu, no veteranus mos foin harii, ami presiza imi nia tulun, no ami mos foin harii banku ida naran Banco do Nosso Futuro, la hatene aban baibrua banku nee lao diak ka lao aat seidauk hatene,” katak Lere.
Nia esklarese, sente kontente simu veteranus sira husi indonezia mai Timor Leste, liu-liu mai rezidensia neebe simples. “Imi mai hanesan mos iha Indonezia no ami ba mos hanesan iha Timor,” hakotu nia.
Iha fatin hanesan, Major Jeneral TNI Purnawirawan, Komaruddin Simanjuntak hatete, sente kontente mai Timor Leste, bainhira atu mai, temi deit naran Lere, veteranus hotu-hotu hakarak mai hotu, maibe tanba aviaun ida deit, nunee veteranus nain 82 deit mak mai.
“Obrigadu Bapa Lere, ami mai iha nee hamutuk nain 82, nee senior hotu, hau lori sira tanba sira iha esperiensia uluk iha Timor Leste, tanba nee ami sei ba vizita mos jardin Metinaro, Seroja no veteranus barak hakarak mai hotu maibe panglima fo aviaun ida deit, no bainhira temi naran Lere sira hotu-hotu hakarak mai,” dehan nia.
Nia espresa, sente kontente mai Timor Leste bele hasoru malu ho nia maluk veteranus sira iha Timor Leste.
Nia hatete, husu mos lisensa aban sei vizita mos eroi sira neebe mak mate oras nee hakoi iha Metinaro nomos eroi sira iha Seroja, sira nia mate tanba luta, maibe buat neebe liu nee liu ona, agora hamutuk oinsa bele lao ba oin.
Nia haktuir tan katak, vizita ida nee hanesan vizita premeiru ho ekipa neebe boot no loron seluk iha loron TNI nia kada tinan sira sei mai vizita Timor Leste, nunee bele hatudu solidariedade no relasaun rai rua forte diak liu tan.
Jornalista: Emerenciana Pinto
Editor: Xisto Mendonça
